ORANJESTAD – Director di Arubus, Sr. Theo Croes a lamenta e welga cu sindicato STA y trahadonan a organisa ayera. A pesar Sr. Croes a bisa cu e accion aki no tabata un sorpresa, ya cu fei diamars nan tabata na haltura cu e trahadonan tabatin plania di bay den accion.
Sr. Croes a analisa tur e puntonan cu STA y e trahadonan a bin cun’e pa hustifica e welga, pero e no ta haya cu nan ta motibo pa bay den accion. “Si nan ta considera esaki motibo pa welga, e ta keda na nan. Pero ami no ta haya cu esaki ta e motibo of e manera adecua pa e wordo haci”, segun director di Arubus.
Sr. Croes a bisa cu e mensahe cu inicialmente e trahadonan a manda ta cu nan a bay den accion pasobra e busnan no tin airco. E director di e compania di transporte publico a bisa cu “humanamente mi tin comprension”, ya cu den e dianan aki nos ta confronta un situacion abnormal di calor. Sinembargo el a laga sa cu Arubus ta existi pa 36 aña y durante 30 aña e busnan no tabatin airco.
Airco den bus
Despues a bin cu e busnan Chines cu tabatin airco, pero e airco a daña despues di dos siman. Nan a drecha nan full pero sistematicamente nan tabata bolbe daña, y a yega un momento cu no por drecha nan mas. Pues durante e ultimo cuater aña e trahadonan a core e busnan sin airco. Despues tres aña pasa nan a bin cu e bus marca International cu airco y algun di nan a daña y nan a wordo raporta debidamente. Pero despues nan a stop di raporta si tabatin mas bus Internacional cu problema di airco, ya cu apenas e tabatin dos bus raporta, mientras cu tin 6 pa 7 daña.
Sinembargo nan a wordo drecha, pero actualmente tin tres cu tin problema cu airco y nan ta ariba parkeer. E no ta haya cu ta motibo pa e trahadonan bay den accion mirando tur e esfuerso cu a wordo haci pa drecha nan.
Otro puntonan
Tambe e mashin den bus mester wordo actualisa ta otro punto cu e trahadonan ta reclama. Pero el a bisa cu e trahadonan no ta trahando debidamente nan rapport y esaki nan a yega di discuti riba dje. Tambe den e reunion cu representante sindicato STA a wordo informa riba e situacion aki.
Relaciona cu e paradero di bus cu ta den mal estado, Sr. Croes ta reconoce cu berdaderamente ta asina, y nan ta bay drecha y ya caba tin un plan y nan ta trahado riba e parti financiero. Riba e sushedad paden y pafo di e bus, e ta admiti cu tambe ta berdad. E ta bisa cu tin algun di nan cu por ta Sali sushi ya cu nan ta wordo laba nan man y “e por pasa”.
E punto relaciona cu e busnan na mal estado, Sr. Croes a bisa cu tur bus no ta Sali sin cu e no ta wordo inspecciona y cu e ta safe pa Sali, y esaki ta e problema cu nan ta corto di bus.
Un punto cu e ta haya “ironico of dificil” ta esun di cambia uniform bek pa e color anterior, e color geel. E motibo di e cambio aki ta pasobra e carson blauw ta atrae solo. Sr. Croes a bisa cu e tipo di carson aki e trahadonan ta uzando pa 36 aña, y e no ta haya cu esaki ta un motibo pa e trahadonan bay welga pasobra nan kier color geel enbes di color blauw.
