“En berdad ministerio di TVS a ricibi no solamente un carta sino henter un dossier di keho riba funcionamento di e director Jerry Staring. Como minister ta tuma esaki hopi na serio y na un manera responsabel ta atendiendo cu esaki. Nos ta den contacto continuo cu DRH pa asina por sigui e proceso segun regla”, tabata palabranan di minister Dangui Oduber (MEP) riba pregunta di Bon Dia Aruba di kico ta e situacion cu sr. Staring.
E carta ta indica cu sr. Staring ta crea un cultura di miedo y tambe a reemplasa personal cu personanan no adecua. Tambe ta papia di un cultura unda tin trato preferencial di cierto trahadonan (vriendjespolitiek).
Durante dia di ayera, Bon Dia Aruba a haya diferente notificacion, tanto di fuentenan como tambe di algun trahado di Departamento di Salud Publico (DVG) mes, indicando cu ‘lo a bula cabes di e director afo’. Minister Oduber riba pregunta di Bon Dia Aruba si sr. Staring a wordo manda cas of si e ta funcion ainda, e ta splica cu ‘na e momentonan aki e ta den funcion pendiente decision riba e proximo pasonan’. Apart di un carta cu ta circulando, a bin comprende cu tin mas keho entrega contra di e director, pero no tin informacion concreto riba esaki ainda.
Segun nos redaccion por a comprende ta cu e intencion ta pa pone un management team na e departamento y retira e director for di su funcion. Esaki no a wordo confirma door di e minister y unico cos cu el a indica ta cu posiblemente awe lo tin un briefing riba e tema aki.
Situacion
Durante e fin di siman cu a pasa, un documento cu mas o menos 25 pagina a cuminsa circula rond via diferente medio, na unda cu un trahado di DVG, Jayburrt Dijkhoff a manda un carta cu diferente keho riba e director. Den e carta aki, sr. Dijkhoff ta duna di aparenta cu e tin sosten di hopi otro colega, algo cu te na e momento aki no a wordo confirma.
Como parti di e carta aki tambe sr. Dijkhoff a agrega un bijlage di un carta cu a ser manda pa un grupo di persona, acusando dos otro trahado di abuso di nan poder. Di otro banda a aparece un otro carta awo caminda sr. Dijkhoff ta pidi disculpa na e trahado ney y ta pidi tanto minister como demas hende pa saca afo e bijlage aki for di henter e pakete.
Locual nos redaccion a tuma nota di dje si ta cu e fuente 24ora.com (cu e gobierno actual na varios ocasion a categoria como fake news) ta interpreta e carta ultimo aki di sr. Dijkhoff como algo cu e no tin sosten di demas colega. Sinembargo e carta di sr. Dijkhoff ta papia specificamente di 1 solo bijlage y ta disculpa su mes solamente pa e fout ey specifico. Pues no tin niun confirmacion si sr. Dijkhoff ta conta cu sosten of no.
Durante dia di awe nos redaccion lo purba di haya mas informacion di e departamento mes como tambe e director.
