Director Artistico di Aruba Symphony Festival & Academy, Simon Gollo a expresa cu satisfaccion riba e balans y resultado di 10 di actividad musical y academico cu a tuma luga Aruba.

Gollo no ta wak e exito como algo riba tereno di bo realisacion profesional, sino con ta contribui na e construccion di personanan honesto y profesional, despues cu bo a biba su experiencia musical na Aruba. “Pa mi esey ta e resultado real!,” el a bisa. E berdadero resultado ta cu e participantenan di ASFA ta bay cu un bunita experiencia.

E biaha aki tabatin studiantenan di casi 15 pais rond mundo entre nan China, Hulanda, Mexico, Brasil, Colombia, Venezuela, Merca, etc… E echo aki ta duna otro dimension y caracter internacional na e festival. Cada mucha tabatin su propio historia riba nan esfuerso pa bira realidad nan soño pa bin Aruba.

Nan a organisa recaudacion di fondo, of nan a bati e porta di nan autoridad local of di nan famia pa pidi ayudo pa bin Aruba. Pero un aspecto importante ta cu nan ta bay bek cerca nan comunidad, unda nan lo papia di Aruba. No solamente cu nan a bay conta riba e bunita beachnan cu Aruba tin, sino cu nan lo keda cu e recuerdo pa semper cu nan a bin un isla unda nan a comparti y nan a descubri cosnan hunto. Eynan ta loke e Gollo ta considera cu e proyecto di ASFA ta bira mas exitoso.

CRECEMENTO
Si nos ta bay 5 aña atras ora cu pa prome biaha e festival aki a tuma luga riba nos isla, e violinista y director di orkesta aki ta haya cu tin un crecemento visibel pa tur hende. E ta haya cu e satisfaccion ta cu e festival ta sigui crece tur aña. “E cultura y bida musical na Aruba tin cu sigui crece… Nos ta considera nos mes parti di e desaroyo aki,” el a declara na Bon Dia Aruba.

Gollo ta haya cu Aruba no solo mester bira un destino turistico caminda e bishitantenan ta bin solamente pa nos beachnan, sino tambe pa loke nos por ofrece cultural y educativamente. Turismo mester ta un recurso –segun Gollo- cu por sustenta su mes, ya cu beach tin den diferente parti di mundo. Pero masha poco bo ta wak un proyecto musical di e caliber aki cu ta involucra hendenan local y turistanan.

Di un banda, e publico a bira mas grandi compara cu e añanan anterior. E calidad di cada concierto tabata uno bisto tambe. E tabata un festival hopi consistente. Cada anochi di concierto nan a bin cu un proposicion musical varia y cu musiconan diferente. “Mi ta kere cu e publico a diberti!,” el a bisa.

E biaha aki a conta cu presencia 20 musico di diferente parti di mundo, entre nan Benjamin Zander, Pacho Flores y mas artistanan di trayectorio y renombre internacional. E version di e festival aki tabata uno nostalgico pa Gollo, ya cu e tabata un re encuentro cu musiconan cu el a yega di comparti na Venezuela, tempo cu e tabata organisa e Nuevo Mundo Festival na Maracaibo.

Tambe e festival a bira un ocasion special pa e publico cera conoci cu compositornan. E biaha aki tabatin un particularidad cu e maestronan a toca hunto cu nan studiantenan, locual tabata stimula e musiconan jong aki. Un punto cu Gollo ta haya importante cu di haci cu e proyecto aki ta descubri, yuda y apoya e hobennan, independientemente di kico lo bira nan destino.

INSTITUCIONALISA
Na final el a sentencia cu e di 5 Aruba Symphony Festival & Academy a bira uno cu a permiti nan wak e futuro cu hopi entusiasmo y compromiso. E ta spera cu e instancianan tanto publico como priva por sigui suma nan esfuerso pa e festival por wordo institucionalisa. Prome cu Gollo a bandona nos isla, e musico a sostene diferente reunion, entre nan cu Gobernador interino, Yvonne Lacle-Dirksz. Esaki ta un aspecto importante, ya cu nos autoridadnan local ta balota e seriedad, importancia y contribucion di e festival pa Aruba.

E ta spera cu Ministerio di Cultura, Enseñansa, ATA, AHATA, y otro instancianan por haci un esfuerso comun pa stabilisa ASFA na Aruba. “Esaki ta un peticion hopi importante,” el a bisa. Ya cu e festival aki mester wordo institucionalisa na Aruba. E ta haya cu e festival aki no solamente mester depende di e generosidad di e musiconan di bin comparti cu ne na Aruba sin interes. Nan ta bin pasobra nan ta kere den e credibilidad cu e festival aki tin, locual ta crea un responsabilidad mas grandi cerca nan team.

Con leu Aruba ta pa ASFA por bira manera un Aspen Festival den nos region? Esaki ta un vision cu Gollo tin, y cu e ta haya cu cada aña nos ta mas cerca di dje. Cu un sonrisa riba su cara, e ta ripiti: “Estamos mas cerca!”