Directornan Mexicano ganador di OScar, Guillermo del Toro y Alejandro Gonzalez Iñarritu a join actriz Salma Hayek pa crea un fondo pa yuda duna sosten na trahadonan di industria di pelicula cu a keda sin trabou pa motibo di pandemia di coronavirus.
Academia Mexicano di Arte y Ciencia di Cinema a anuncia e fondo diahuebs.
Gonzalez Iñarritu a papia via video yamada: “Esaki tabata un acto di solidaridad cu nos colega den e industria, sin pidi niun otro hende mas cu nos mes.”
E fondo a colecta $440,000 te awo, y ta sperando mas donacion. Cada beneficiario lo ricibi un pago di alrededor di $885.
E placa lo bay prome na trahadonan tecnico, manera empleadonan di set, costume, zonido y visual, kende a keda sin trabou despues cu mayoria di produccion a stop di filma memey di e pandemia. Prome na linea lo ta esunnan cu ta sufri di problema di salud of ta e unico trahado den nan famia.
La Corriente del Golfo, un compania funda pa Gael Garcia Bernal y Diego Luna, tambe a contribui na e fondo, igual na cantidad di otro compania di produccion Mexicano y internacional.
E academia ta calcula cu alrededor di 30mil trahadonan di produccion di pelicula a perde nan entrada como resultado di ceramento di e industria.
Gobierno y lidernan di industria no a anuncia un fecha pa resumi produccion.
