Directiva y conseho di partido MEP lo trata e renuncia di Sue-Ann Ras

Bistiendo su pechi como Presidente di partido MEP, Parlamentario Hendrik Tevreden a declara cu nan lo atende debidamente den seno di partido parlamentario Sue-Ann Ras su renuncia.

Den su funcion di presidente di MEP, Tevreden tin e tarea segun statutonan di partido MEP di cuminsa cu e proceso aki. Segun presidente di MEP, nan ta haya e retiro di nan colega ‘algo hopi pisa.’ Unabes cu nan ta termina e proceso, nan lo divulga dilanti di prensa pa asina trece mas claridad riba e pasonan cu a wordo tuma y kico nan a dicidi den conseho y directiva di partido.

Prome cu el a bin cu su declaracion, Tevreden a presenta e video cu tabata e via cu Ras a uza pa anuncia su decision di retiro for di Parlamento y politica. Presidente di MEP a bisa cu den e video aki nos por mira cu su colega ta hopi kibra pa locual a sosode na Hulanda, ora cu el a wordo graba mirando un pelicula den pleno reunion inter parlamentario di Reino (IPKO).

Den nomber di su partido, e ta desea forsa y solidaridad pa su futuro. Nan ta sostene su colega den su decision. Tevreden a pidi pa pueblo duna su colega e espacio y tempo pa e por deal cu e situacion cu e ta pasando aden. Nan start e proceso riba Ras su solicitud di pone disponibel y na disposicion di su partido, su stoel den parlamento; y pronto lo duna di conoce kico lo ta e decision final. E no ta descarta cu den dado caso, directiva y conseho di partido MEP por acerca Ras pa reconsidera su peticion di retiro. Pero esaki ta parti di e proceso cu ta habri ainda y cu ta cuminsa awor.

Sinembargo, e ta considera pa trece un transparencia riba e caso di Ras, ya cu e caso aki mester wordo mira den su contexto y totalidad. El a trece dilanti cu su colega, hunto cu e otronan cu a bay reunion di IPKO, tabatin un siman basta pisa. Pero den su caso tambe e mester atende cu e perdida di un familiar, unda e mester percura pa tur areglo cu mester tuma luga.

E tin di bisa cu Ras a mustra grandesa di admiti su eror, y el a tuma e pasonan cu ta cuadra cu esaki. Ya cu e ta para pa integridad, y e ta reconoce cu locual el a haci tabata un eror. Nan ta spera cu e decision di Ras por ta un ehempel pa politica den general y tambe pa nos comunidad.