Obispado di Willemstad y directiva di e comision di mayor di alumno di Colegio Arubano, OCCA, a haya contesta di parti di directiva di SVOA/SMOA, riba nan carta reciente den cual e dos entidadnan, cu tin asiento den e directiva di SVOA/SMOA, a pidi e directiva actual den su totalidad pa baha. E contesta tabata un ‘no’ categorico, den un carta di 5 pagina den cual e directiva a expone nan punto di vista ampliamente.
Directiva di SMOA ta haya cu e dos entidadnan a decepciona nan pasobra nan a saca conclusion demasiado rapido a base di noticia for di rednan social tocante problemanan na e scol, sin haci un investigacion adecua y sin cu nan a duna e directiva e oportunidad pa duna nan banda di medaya. Ta bisa den e carta cu ta Obispado y OCCA a rechasa invitacion pa papia di e preocupacion cu Obispado y OCCA ta mira. Tambe ta bisa cu no tin ningun crisis den e directiva; tin cuatro miembro actualmente cu ta mas cu e minimo requeri pa estatuto. Na e scol tin dirigencia presente cu un rector interino experimenta.
Directiva di SMOA ta haya tambe cu no ta na su lugar pa baha conhuntamente como directiva, pasobra esey ta laga e organisacion sin dirigencia, loke ta representa un peligro pa e organisacion. Por ehemplo, ta bisa cu e ora no por tuma decision encuanto asuntonan financiero y tampoco por haci ningun pago. Ta p’esey, segun e directiva, e statutonan ta prescribi un salida ordena pa conserva experiencia y conocimento den e directiva. Igualmente e directiva no ta di acuerdo cu e peticion pa para e proceso di solicitud pa un rector nobo pasobra esaki lo mester cuminsa pa 1 di augustus proximo.
Ademas directiva di SMOA ta mustra e dos entidadnan cu nan tin solamente derecho di nombra un miembro di directiva cada uno, pero cu nan no tin un derecho statutario pa retira un miembro. Tambe ta pidi Obispado pa nombra un persona como nan representante, loke no a sucede ainda. Si esey tuma lugar anto ta keda dos puesto habri ainda den e directiva, y e directiva di SMOA gustosamente kier tende di banda di e dos entidadnan si nan tin candidato cu nan kier presenta, preferiblemente cu un background financiero o di enseñansa. Ta recorda Obsipado si cu si nan no nombra un candidato dentro di e periodo stipula den e statutonan, anto e directiva y OCCA por encarga nan mes cu nombra un persona na e puesto ey.
Finalmente e directiva di SMOA ta reitera su posicion cu no ta mira ningun motibo pa renuncia. E directiva ta bisa di a traha semper ‘naar eer en geweten’ y sin cobra nada.
