Diahuebs ultimo, directiva nobo di Asociacion Amigos di Colombia (Asocol) presidi pa Moises Fernandez a realisa un bishita di cortesia cerca e Consul di Colombia na Aruba, Mirza Gnecco.
Nan a sostene un charla largo y ameno caminda cada miembro di e directiva di Asocol a papia y nan a expone e maneho nobo y nan vision pa fortalece e asociacion aki. E directiva aki a keda eligi dia 25 di juni ultimo; y ya caba nan a mustra un boluntad di trabou organisando un acto protocolario den cuadro di Dia di Colombia y un actividad familiar di integracion den rancho Villa Floralina.
Nan a laga sa cu un di su meta ta esun di restructura e asociacion aki y bin cu un maneho transparente di nan fondonan manera nan statutonan ta stipula. Tambe nan kier revisa nan statutonan pasobra nan ta haya cu nan ta demasiado bieu.
Pero principalmente nan kier fortalece e asociacion aki buscando mas miembronan considerando cu e comunidad Colombiano ta uno grandi na Aruba. Nan ta reconoce cu e retonan cu nan tin ta uno grandi; ya cu nan mester atende entre otro cu asuntonan financiero y debenan pendiente y nan no tin fondo, pero nan ta masha positivo di por saca e asociacion aki dilanti.
Nan tin proyecto pa embeyece e plasa di “E Condor” dilanti di Princesmart; y evalua con nan lo sigui cu e proyecto di construccion di nan sede. Igualmente nan kier bin cu programanan di capacitacion, educacion y recreacion pa nan miembronan.
Di su banda, e diplomatico Colombiano a curasha e miembronan di e directiva pa e asociacion aki lo por bira un plataforma pa sigui traha na bienestar di e comunidad Colombiano na Aruba. Sra. Gnecco a laga nan sa cu como diplomatico e ta limita pa compromete su mes cu actividadnan cu no tin di haber directamente cu e consulado. Sinembargo el a expresa cu nan lo brinda e ayudo necesario te hasta unda nan por, pa asina e asociacion aki lo por sigui crece y realisa nan metanan.
