Asociacion di personal di Staf di WEB Aruba NV, VWI, a lesa y studia e Ontwerp Landsverordening (OLV) titula “Landsverordening Normering Topinkomens”, abrevia “LNT”, hunto cu su Memorie van Toelichting y e conseho di Raad van Advies riba e LNT. VWI a keda asombra, pa no bisa babuca, di e contenido proponi den e OLV-LNT aki.

E OLV-LNT ta miho conoci den boca di pueblo manera e “Evelyn-Wever-Croes-Norm” (EWCNorm), cual Gabinete Wever-Croes a hiba pa Hulanda riba scalchi di plata pa Hulanda inclui esaki como condicion pa Aruba haya sosten di likides fia (mescos cu GdA a haci pa cu e 12.6% recorte den salario).

Asina’ki porfin Gobierno di Aruba (GdA) por a haya un pretexto pa por corta den e salarionan di directornan y ehecutivonan di e companianan estatal Arubano y pone un “maximum” den esaki. E pregunta principal ta: kico ta e balor agrega di e “maximo” aki di e salario di directornan y ehecutivonan di e empresanan estatal? GdA kier “spaar placa” cu esaki? GdA kier por cobra mas dividendo for di caha di e companianan estatal door di implementa e LNT?

Interesante ta cu den e LNT ta poni un maximo di 261.000,- florin maximo (Articulo 9 di e LNT) pa aña pa ehecutivonan di empresanan estatal pero e LNT no ta aplicable pa “politieke ambtsdragers” (cf. Artikel 3 lid a).

Segun e Memorie van Toelichting e salario di e politieke ambtsdragers (por ehemplo, nos Minister President) ta regula pa e “Landsverordening voorziening politieke ambtsdragers”, y p’esey e salario di Parlamentarionan y Ministronan ta regla pa ley caba. Esaki ta corecto.

Sinembargo VWI ta di opinion cu GdA ta comete un eror fundamental di pensamento den su argumentonan treci dilanti den e Memorie van Toelichting pa e implementacion di e LNT. Ta berdad cu GdA, como unico accionista, of accionista mayoritario, di e empresanan estatal, ta den su derecho pa stipula salario di e ehecutivonan y comisarionan cu ta maneha un empresa estatal. Ta berdad tambe cu e maximo di 261.000,- florin pa aña imponi pa e LNT ta parce gran cos y ta mas halto cu e salario di un Prome Ministro. Pero echo ta cu e posicion di

Prome Ministro, Ministro of Parlamentario ta keda netamente un posicion politico. E posicion di un director di un compania estatal, teoreticamente, no ta supose di ta un posicion politico, pero un posicion netamente profesional. Dus, crioyamente bisa, maneho di un compania estatal manera WEB, ELMAR, SETAR, etcetera ta rekeri di un profesional y no di un politico.

Den e mercado laboral profesional internacional na nivel di CEO, un jaarsalaris di 261.000,- florin pa aña no ta gran cos di canta macamba. Salario di un top profesional den mercado ta algo sumamente competitivo. E compania cu ta paga miho ta haya por en general e miho ehecutivonan traha p’e. E top profesionalnan cu por haya trabao di top salario pafo di Aruba no lo tin un incentiva pa bini Aruba y lidera un empresa estatal a base di e maximo poni den e LNT.

Mas ainda, si e maximo den salario aki ta “trickle down” den e posicionnan clave di staf den e empresa estatal, dus, menos salario lo ser ofreci pa posicionnan clave di staf, e atraccion financiero pa un profesional hoben yiu di tera bini bek Aruba traha ta bira (hopi) menos. Hulanda a introduci e “Wet Normering Topinkomens” (WNT) desde 2013 (e zogenaamde Balkenendenorm) den companianan estatal Hulandes y ta conoci cu esaki a pone cu varios companianan estatal Hulandes a perde hopi talentonan profesional kende a prefera di bay traha pa companianan den sector priva cual si ta paga mucho mas miho pa talentonan top. Bo kier ehecutivonan TOP, bo tin cu paga salarionan competitivo y conforme e industria! Asina e mercado laboral liber profesional ta funciona. “Op de eerste rij zitten voor een dubbeltje”; esaki ta loke GdA tin den mira cu e introduccion di e LNT aki? Dus, purba di contrata profesionalnan top pa un ‘habbekrats’?

E ‘strategia’ no mucho bon pensa aki ta garantisa un futuro ‘brain-drain’ di talentonan top profesional Arubano den nos companianan estatal. Esaki ta loke GdA kier? Lamentablemente ta mustra mas y mas cu e posicionnan di CEO di companianan estatal a bira posicionnan politico mirando tur e racha di retironan forsa di CEO-nan di companianan estatal den e ultimo 7 añanan. Pa colmo, Raad van Advies a laga e OLV-LNT na werki den nan conseho legal. Den luga di siña for di loke a pasa na Hulanda cu e Balkenendenorm, GdA kier aplica algo similar aki na Aruba cual basicamente a demostra di a faya rotundamente na Hulanda. No solamente e posicionnan di CEO den companianan estatal Arubano a bira posicionnan politico, pero tambe awo, cu e introduccion di e LNT, lo bira posicionnan barata den cual lo ta dificil pa haya talentonan top pa aplica. Den tempo, lo barata ta sali (pueblo) caro!

Nota di redaccion: Esaki ta un comunicado di prensa di Vereniging van Werknemers met een Individuele Arbeidsovereenkomst in dienst van de Water- en Energiebedrijf Aruba (WEB) N.V.