Den un comunicado di prensa ayera, directiva di Sindicato di Bombero SINBA a tuma oportunidad pa aclaria algun malentendido tocante nan accion morocoy.
“Despues di nos rueda di prensa nos por a ripara cu algun medionan di comunicacion – probablemente pa motibo politico – troce e informacion cu nos a trece dilanti y purba di manipula pueblo pa desvia na e cashon actual di nos cuerpo”, segun e directiva. “Laga nos ta bon cla cu na ningun momento nos miembronan lo pone e seguridad di nos pueblo na peliger. Den e rueda di prensa nos a laga sa bon cla cu den caso di calamidad y emergencia semper nos lo actua y cumpli debidamente cu nos deber.”
Directiva di SINBA a continua: “Aparentemente e berdad a haci algun hende hopi dolor y awor ta purba pone sindicato y nan miembronan den un luz negativo pa asina sigi sconde e berdad. Un berdad bergonsoso na unda hustamente dor di situacion cu Brandweer di Aruba actualmente ta aden ta e causa cu nos pueblo ta coriendo peliger y ora un calamidad ta presenta nos no lo por actua manera nos kier y manera mester ta.”
Pa finalisa, e directiva di e sindicato a expresa: “Un biaha mas e unico obhetivo di SINBA y su miembronan ta un cuerpo di bombero cu tin e material y equiponan pa por combati cualkier calamidad y husto na e momentonan, aki dor di neglisha e cuerpo e ultimo añanan y un leiding cu ta parce cu tampoco no tin esaki como prioridad, esey no ta e caso. “
