Directiva di Camara di Comercio a tuma nota di un articulo lamentabel cu a aparece den media cu e titulo: “Comercio a vota Contra Presidente di Camara di Comercio”, mirando cu esaki ta apenas un opinion di e persona cu a skirbi e articulo y como Directiva di KvK nos kier a duna un aclaracion riba e echonan y eventonan ya cu no tabata trata un eleccion pa presidente di directiva, si no uno pa miembro di hunta di directiva.

Nos presidente, Sra. Daphne Lejuez, varios siman pasa ya caba a informa directiva di lo no kier sigui como presidente ni forma parti mas di directiva. E la indica di tin otro plannan pa 2017 y lo no por combina esakinan, mirando cu e funcion ta un cu ta rekeri hopi tempo y ta a base boluntario y gratuito. Pero mirando cu no tabata tin interes di parti di comercio pa e tres (3) posicion nan habri, ni di parti di miembronan saliente, na ultimo ora a haci un esfuerso pa sinembargo busca dos (2) miembro pa kleinbedrijf, y nos presidente, mirando e importancia, a dicidi pa e ora pa repostula su mes pa asina sigura cu e posicion di grootbedrijf keda yena temporalmente te ora haya otro candidato. Esaki ta pa directiva di KvK por mantene su autonomia comercial. Ta apenas despues di e esfuerso aki cu e miembro saliente a duna di conoce sinembargo kier repostula, como consecuencia cu e la conduci na un eleccion.
Durante su periodo como miembro di directiva y tambe presidente di KvK, directiva a ricibi hopi elogio pa su logronan, trabou y e retonan asumi pa Sra. Lejuez cu semper a sa di representa e interesnan di comercio di Aruba dignamente.
Algun di e logronan, iniciativa y contribucion durante su presidencia entre otro ta inclui:

  • Mision Comercial pa Cuba (2014)
  • Publicacion Business Environment tocando e reto di “Cost of Doing Business” halto na Aruba cu a inclui diferente sondeo y estadisticonan di e situacion comercial actual
  • Chamber meets the Entrepreneur, unda a organisa charlanan cu diferente sector comercial, entre otro Caya Grandi y sector di Beyesa cu a conduci na dialogo entre comerciante y gobierno pa por busca solucion pa nan retonan.
  • Encuanto e efecto di Aruparking, a haci un survey entre comerciante di Caya Grandi cu a conduci na un reduccion di tarifa mensual pa esunnan cu ta labora den centro di ciudad
  • Establecimento di e comision “Cost of Doing Business” cu e meta pa reduci e “red tape” pa haci negoshi na Aruba
  • Participacion activo den programacion regular di “Nos Mainta Positivo” creando conscientisacion pa empresario
  • Disponibilidad y semper traha incansablemente pa comercio sin interes propio of externo
  • Semper oido pa retonan di comerciante, grandi, mediano of chikito y conhuntamente busca solucion.
  • Semper dispuesto pa sinta na mesa cu gobierno y demas gremio pa logra mehoracion pa comercio y Aruba.

Como Directiva di KvK nos kier mustra nos aprecio y gratitud pa tur e esfuersonan di Sra. Lejuez y ta desea su persona hopi exito pa futuro!