Manera Arubus N.V. a anuncia riba rednan social diadomingo ultimo, ayera mester a tuma luga un protesta pero a dicidi pa cancel’e pa motibo cu nan a yega na un acuerdo cu Minister concerni, Ursell Arends.

Den un comunicado pa prensa, trahadonan di Arubus N.V. a señala cu:

“Nos ta informa cu di banda di Minister y Raad a informa sindicato Seppa cu di nan banda nan ta bay di acuerdo pa laga un compania independiente duna un conseho riba e structura salarial y e proceso hiba. Den esaki e trahadonan y sindicato lo haya e oportunidad pa trece nan obhecionnan (Bezwaar). Cu mas tarda cu 31 maart lo trata e resultado di e revision di e structura cu tur partido na mesa. Si mester cambia, drecha of ahusta esakinan lo wordo haci. E structura salarial (sea nobo, cambia of drecha) ta keda suheto na evaluacion dentro di 1 aña. Gobierno a bay di acuerdo pa extende e CAO pa 2 aña. E suma di 1.850 lo ta netto. E acuerdo aki lo mester wordo mira como extension di e protocol di december 2019 unda entre otro a keda palabra e fecha di 1 januari 2021 como implementacion di e structura salarial,” nan a indica.

Igualmente nan a splica cu nan tin 30 pa 60 dia pa trece y argumenta nan obhecionnan pa cu e structura salarial. Akinan nan lo mester mustra con nan a corta den derechonan di trahado y stroba nan di cana, manera nan a sigura.

“Nos mester por mustra cu e sumanan poni como salario ta corda den boso derecho. Minister a ripiti cu pa fin di februari e lo kier duna trahadonan mes informacion di e Doorlichting y posibel Plan di Rescate. Tambe nan a bolbe ripiti cu nan ta bay haci un investigacion forensico riba e maneho financiero di Arubus N.V.”

Na comienso a wordo bisa cu nan tabata acepta e carta di Minister Arends y cu tampoco nan tabata na unda nan lo mester a bay protesta, e manifestacion aki tabata den conexion cu un bonus di 750 florin cu trahadonan di Arubus a ricibi na december riba nan salario. Sinembargo, awo gobierno a manda un carta den cual ta pidi e trahadonan pa duna e placa aki bek, maske e trahadonan a expresa den medionan di comunicacion local cu lo ta dificil pa duna e placa back mirando cu hopi di e trahadonan a gasta e placa caba.

Den un carta dirigi na Magaly Britto, Presidente di sindicato SEPPA, Minister di Transporte, Ursell Arends a indica cu a ricibi un carta di e sindicato indicando cu e trahadonan ta rechasa e proposicion pa un compensacion di Afl. 3,350 total pa persona den cuadro di e tema di structura salarial.