Den presencia di manager di ekiponan di 9 pa 16 aña na edificio di ATIA, Aruba North Little League (ANLL) a instala su directiva. E votacion a tuma luga den un ambiente ameno, despues cu a presenta na e managernan presente e cyclus di e guia operacional di Little League International pa liganan local y e resumen di PR, secretario y financiero pa temporada 2018/2019.
Ademas a scucha precupacion y sugerencianan di esunnan presente pa asina sigui mehora e funcionamento di e liga.
Un total di 15 manager a vota y resultadonan tabata lo siguiente: Sr. Melvin Quilotte a keda reeligi como presidente; Xiomajra Rafael como vice-president y miembronan general Lisa Giel, Jo-Anne Croes, Magaly Webb, Raul Gei, Sonaly Croes y Elston Figaroa. Lo reparti e diferente funcion den e siguiente reunion como directiva di 2019-2021.
Presidente di ANLL, Sr. Melvin Quilotte a remarca cu e ta satisfecho cu e trabou di e team di ANLL, cu a logra trece bastante structura den e liga den e ultimo dos aña. Cu e mesun entusiasmo lo sigui cu e trabounan den e proximo temporada, cada bes mehorando pa sigui engrandece e deporte di baseball pa ful e isla, no solamente e liga.
Ademas a haci un yamado na e comunidad di Aruba pa inscribi muchanan di edad 4+ cu ainda no ta practicando e deporte di baseball, pa cuminsa train na un di e siguiente organisacion nan den bario: Aruba Juniors veld di Aruba Juniors (563-9850), Braves y Cabosports veld di Playa Pabou (732-9748), CBN veld di Centro di Bario Noord y veld di JTL (592-3819), Blue Marlins veld di Saliña Serca y veld di JTL (593-9029), Hammersharks veld di Kudawecha y Calabas (592-3232). E programa di Little League tin como lema: caracter, curashi y lealtad y ta ofrece un cantidad grandi di experiencianan unico y beneficioso pa nos muchanan y nos comunidad.
