Den un entrevista pa Bon Dia Aruba, Sra. Nicole Vrolijk, raadsonderzoeker na Directie Voogdijraad, ta splica tocante e sistema nobo cu Directie Voogdijraad ta usando hunto cu Bureau Sostenemi, kico nan meta ta pa proximo aña y kico ta e situacion cu e lista di espera cu tabata un problema den ultimo añanan.

Directie Voogdijraad ta un instancia cu manera hopi instancia na Aruba ta traha pa bienestar di menornan di edad. E instancia tin dos afdeling, tin e parti social y tin e parti financiero. E parti social ta encarga di haci investigacion, nan ta haya melding a traves di Bureau Sostenemi of corte, y e parti financiero tambe clientenan ta bin haci pregunta tocante alimentatie of ta traha cu decreto di corte.

Lista di espera di Voogdijraad tabata un problema den e ultimo añanan, pa motibo di falta di personal. Pa cu esaki Vrolijk a remarca cu nan tin algun aña trahando ariba e lista di espera y a logra baha esaki basta y ta cerca di ta completamente cla. Aworaki e meta ta cu na momento cu un caso drenta, esaki ta pasa via intaker, pasa pa e coordinador y asina un trahado lo por tum’e over di biaha.

“Esey ta nos meta, pero claro aki aya e ta bira poco dificil mirando e cantidad di melding cu nos ta haya, pero nos ta purba di yega na esey di biaha. Nos ta bezig cu sistema digital cu ta haci e proceso un poco mas facil pa e parti administrativo y asina e proceso por cana un poco mas lihe tambe”, el a indica.

Pa loke ta ayudo social, e punto pa meld casonan ta Bureau Sostenemi, esaki ta un sistema nobo. E meldingnan ta drenta na Bureau Sostenemi, nan ta haci e investigacion pa wak ki ta e ayudo cu tin mester, si esaki por bay boluntariamente entre mayornan. Na momento cu e investigacion demostra cu e situacion, e caso, no ta optimal pa e mucha y no ta bay boluntariamente, e caso ta pasa pa Voogdijraad

“Nos ta haci investigacion dependiendo di e tempo cu a pasa despues di e melding te na momento cu el a yega cerca nos. Nos ta traha cu medida, nos ta traha cu corte. Nos ta discuti e caso internamente cu e coordinador, un hurista, un psicologo y e investigador y hunto nos ta dicidi kico ta pasa”, Vrolijk a splica.

Den e parti social nan ta brinda ayudo pa loke ta areglo di bishita, esaki tambe ta boluntario. Un trahado ta sinta cu e cliente y si e areglo di bishita no ta bay bon of no tin bon comprendemento entre e mayornan, e ora nan ta sinta cu nan y traha un contract pa nan sigui esaki. Na momento cu un di e mayornan ta sinti cu no por sigui e contract, nan por semper bay corte haci peticion pa esaki. E lo bin back Voogdijraad, pero e ta bira un otro proceso.

Pa loke ta otro aña, Vrolijk a indica cu e meta ta pa flow un tiki mas pa loke ta trata e casonan, cu e sistema nobo cu tin aworaki, na unda e meldingnan ta drenta via Bureau Sostenemi, por ta mas concretisa pa yuda nan haci nan trabou un poco mas lihe y asina yega na e punto principal cual ta e bienestar di e menornan.