Dia Internacional di Adulto Mayor 1 di october tambe ta bay ser conmemora pa Directie Ouderenzaken caminda su director Desiree Helder a splica cu esaki ta un dia cu Nacionnan Uni a proclama 34 aña pasa y nan a informa riba e actividadnan cu ta prepara pa e luna aki dirigi riba nos grandinan.

Helder a informa cu e tema di e aña aki ta trata di “Dignidad den envehecemento” y tambe pa wak con nan por fortalece e sistema di cuido pa adultonan mayor, pa e motibo aki nan ta bay organisa tres diferente evento.

Den e prome ta bay trece dilanti e tema di dignidad y e importancia riba e parti di movecion y nutricion, esaki lo tuma luga diasabra 12 di october den oranan di mainta na JFK Center, e dia aki nan lo enfoca riba e adulto mayor mes.

Dia 18 di october ta e di dos evento na JFK Center tambe enfoca riba e cuidadonan di adultonan mayor, pakico ta importante pa trata un adulto mayor cu dignidad, kico tur ta encera esey y con hendenan grandi mester tene na cuenta cu nan salud, pa no tene stress “pasobra esaki normalmente ta un trabou dificil, un trabou pisa unda nan mester siña nan mes con pa deal cu emocionnan pa nan por sigui yuda e adultonan mayor lo mas miho posibel,” Helder a bisa.

E ultimo evento ta bay ta dia 26 di october igualmente na JFK Center y lo ta dirigi pa cuidadonan di adulto mayor den cas, vooral esnan cu ta famia of bisiña cu ta duna aporte of sosten na adultonan mayor pa nan keda funciona debidamente na nan cas, manera Helder a señala.

Den prome evento evento nan ta enfoca riba adulto mayor mes y riba nan dignidad, con por traha cu esey, con nan por promove esey y den e dos otro ta enfoca riba esnan cu ta sostene e adultonan mayor pa mantene nan dignidad.

“E deseo ta pa adultonan mayor keda funciona lo mas miho posibel den nan mesun cas, den nan mesun ambiente y esey ta loke nan ta custuma cune, ta parti di nan dignidad,” el a sigura.

Helder a bisa cu un di nan tareanan mas importante como Directie Ouderenzaken ta pa duna informacion pa atende cu casonan cu kisas debi na falta di informacion, falta di educacion pa esnan cu ta den cas di cuido of den cas mes “e ta un tarea hopi importante pa nos di sigui keda alerta pasobra nos kier sigui brinda un cuido di calidad na adulto mayor tambe.”

Pa loke ta trata e parti di ley, Helder a declara cu sigur esey mester wordo trata y esey tin nan atencion, “lo cual cu mester cuminsa cune ta e respet pa adulto mayor, cu nos como comunidad tambe ta al tanto di e problematica di adulto mayor ta pasa den dje actualmente y pa nos mehora e situacion ey. Nos como Directie tin e tarea ey pa educa comunidad.”

Directie Ouderenzaken ta conformando un helpdesk cu ya caba ta habri pero nan no tin tur cos in place segun Helder a bisa, pa asina por yega na un punto di atende cu keho cu ta trata di abuso, e personanan por acerca na nan.

E helpdesk ta habri pa cualkier informacion cu tin mester di dje cu tin di haber cu casnan di cuido, con pa yega na nan, con pa bin na remarca pa lista di spera di SABA “pero nos ta trahando pa na momento cu nos ta haya un keho nos lo mester atende cune y nos lo por sirbi e adulto mayor cu esey tambe,” Helder a informa.

Pa loke ta trata e Foro Nacional di Adulto Mayor, Helder a bisa cu nan tin algun puntonan den spera pa asina traha e rapport final y keda cla prome cu fin di aña y “pa nos cuminsa traha riba e recomendacionnan tambe.”

Tambe el a expresa cu den foro tabatin expertonan for di Hulanda y otro paisnan unda cu nan por siña di experticio di nan y por tuma nota di proyectonan cu por funciona na Aruba teniendo na cuenta e sabiduria di esnan cu a haci esey caba.

“Y esey nos ta haciendo tambe, nos tin hendenan cu ta yudando nos pa cuminsa encamina e proceso di bin cu exigencianan di calidad por ehemplo pa casnan di cuido, exigencianan di higiena, tambe hunto cu Inspectie Volksgezondheid Aruba (IVA) nos ta haciendo esey y asina tambe por yega na cuanto e ta costa pa un adulto mayor, esey ta procesonan cu ta canando nan caminda pero e ta basta complica. P’esey e Directie a ser lanta, pasobra e no ta un cos cu den un rato bo ta soluciona, ta cosnan cu structuralmente mester set up na Aruba pa nan tambe keda sostenibel.”

Pa finalisa, Helder a señala cu nan ta trahando pa fortalece e lasonan estrecho cu nan mester tin “pa tin un cooperacion general pa loke ta trata cuido di adulto mayor.”