Directie Natuur en Milieu kier sa unda tin mas Pal’i Sia Cora

Algun siman atras un miembro activo di un organisacion ambiental, a entrega un keho oficial relaciona cu rosamento di e tereno na unda lo bay construi un moskee na Sabana Basora.

E mata di Pal’i Sia Cora (Bursera Simaruba) cu a ser kita di e tereno aki ta flora protegi pa ley segun e Decreto Nacional Proteccion di Flora y Fauna local (Landsbesluit Bescherming Inheemse Flora en Fauna). E caso mes tin cu cana su proceso di investigacion prome cu Directie  Natuur en Milieu (DNM) por elabora extensivamente riba dje.

Director di DNM a menciona den transcurso di siman pasa, durante un entrevista, cu DNM  tawata conoce solamente 2 di e matanan aki. Cu otro palabra, ta 2 localidad so tin unda e Pal’i Sia ta ubica. Awor cu a kita uno, kibrando ley, lo mester warda pa wak kico por ta e solucion pa esaki of kico lo por ta e consecuencia di e acto castigabel aki.

DNM no solamente kier trece dilanti cu e flora ta protegi, pero tambe cu pa otorgamento di tereno di mas cu 750m² tin un proceso legal y cu DNM tin un rol na inicio cu ta di inventarisa y duna conseho riba e proceso di otorgamento di tereno y condicionnan.

E Pal’i Sia Cora ta un mata masha scars na Aruba y DNM kier a haci un yamada na comunidad pa yuda nos aloca na unda por tin mas di e Pal’i Sia Cora, den cura na cas of den mondi. DNM tin un website www.midinosmatanan.com cu ta e plataforma pa comunidad yuda pa informa unda e matanan ta ubica. Na inicio di e proyecto di midi nos matanan, DNM a haci e yamada pa matanan cu troncon grandi, pa midi esakinan pa nan tambe por bin na remarke pa proteccion den futuro. Nos ta haci yamada na pueblo pa haci uzo di e plataforma aki pa yuda cu localisa tambe e matanan Pal’i Sia Cora.

Si bo persona ta reconoce e mata aki, manera den e potret, sea bo tin e den cura of sa di un cunucu unda tin un, por saca su potret y pone riba e plataforma. Nos ta pidi solamente pa su ubicacion, kier men, si bo no ta dispone di un meetlat of meetlint, toch nos ta pidi un potret di e mata y su localidad y tur informacion ta keda confidencial.

DNM ta gradici comunidad pa e esfuerso pa nos por localisa tur e matanan di Pal’i Sia Cora y e matanan cu troncon grandi rond Aruba, asina por proteha nan mas efectivamente.