Prome Minister Evelyn Wever-Croes den un conferencia di prensa di ayera dialuna a señala cu departamento Directie Infrastructuur en Planning (DIP) ta atravesando hopi problema y complicacion debi na e corupcion na gran scala cu a tuma luga cu e ministernan di Infrastructura anterior.
Den esaki, el a menciona parlamentario di partido AVP Benny Sevinger, e cual ta un sospechoso den e caso penal Avestruz y e ex-politico Otmar Oduber cu tambe ta sospechoso y envolvi den investigacionnan di e departamento aki.
“E tin nos atencion, mi mester a depolitisa DIP inmediatamente ora mi a tuma e cartera over. Mi mester a haci’e pasobra e linea cortico y facil cu tabatin entre minister y e departamento cu nan tabata mas uza a pone cu mester a corta esey,” prome minister a indica.
Esaki ta nifica cu minister no tin decisionnan mas pa tuma di ken ta haya tereno, ken ta haya permiso, ken ta haya excepcion etc., manera el a enfatisa.
Di otro banda DIP ainda no a logra tampoco pa e mes por carga tur e responsabilidad cu ta supone di carga ora minister no tabata t’ey mas y den esey nan ta aworaki.
Recientemente a habri un otro investigacion y e departamento aki segun el a sigura, tin instruccion di Gobierno pa traha e manehonan y ehecuta nan manera e mester ta pa Aruba.
Di loke ta trata e comerciantenan cu ta pariba di brug, el a expresa cu di e critica cu nan tin, Gobierno tin atencion p’e. Nan tabata den un conseho di minister cu a tuma luga na San Nicolas par di dia pasa na unda diferente comerciante a haci un presentacion y den e reunion ey DIP y DOW tambe tabata presente “pa mustra e importancia cu nos como gobierno ta sinti cu e departamentonan aki mester ta envolvi den e desaroyo di San Nicolas. Nos a haci par di palabracion importante y mi ta espera cu nos por trece desaroyo pa San Nicolas cu nos tur ta buscando”, el a señala.
Ademas, el a splica cu despues di pandemia mester a trece orden den e desorden cu tabatin. Tur negoshi cu no tabatin permiso pa basta tempo, e tin cierto derechonan pasobra “el a wordo tolera”, pero aworaki ta momento pa drecha e situacion y busca e permisonan cu mester busca. Ta berdad cu tin e retraso por ehemplo den permisonan precario, “pero nos punto di salida como gobierno ta esaki: lo cual cu no ta legalisa mester wordo legalisa si por segun ley y si no por mester yega na un otro areglo”, prome minister a sigura.
