Gobierno di Venezuela a tuma accion contra Representacion di paisnan Europeo na Venezuela, entre otro Hulanda, Spaña, Italia, Reino Uni, Suisa y a limita embahadanan na 3 diplomatico.
Segun un comunicado di Directie Buitenlandse Betrekkingen Aruba, embahador di Reino Hulandes y dos persona acredita so lo keda na traha na Embahada, hunto cu e staff local. Demas personal Hulandes lo mester sali di Venezuela dentro di 48 ora. Pues e accion ta solamente trata di reduci e personal diplomatico na e momentonan aki.
Servicionan consulario na nos ciudadanonan lo por continua, y peticionnan pa visa tambe por sigui wordo procesa na Caracas.
Ainda no ta conoci si esaki ta e unico medida contra Reino Hulandes y otro paisnan of si mester spera mas. Reino Hulandes en todo caso ta alerta y prepara pa diferente scenario.
Despues cu diabierna ultimo Maduro a keda huramenta pa un di tres termino presidencial di seis aña, paisnan rond mundo a reacciona cu un ola nobo di sancion. Entre nan, Union Europeo a impone sancion riba 15 oficial top Venezolano cu tabatin un rol den eleccion 2024 na e pais Sur Americano.
Entre e sancionadonan tin presidente y vice-presidente di Corte Supremo Venezolano, agencia electoral y otronan, kende e bloc di 27 nacion a bisa a pone democracia di e pais den riesgo despues di eleccion ultimo. Despues di eleccion na juli di aña pasa, Hulanda a ofrece lider di oposicion, Edmundo Gonzalez Urrutia, kende a declara victoria den e eleccion, refugio na e embahada Hulandes na Caracas.
Segun un articulo riba NL Times, Venezuela a critica e reaccion “hostil” di e paisnan en cuestion pa cu reeleccion di presidente Maduro. Hulanda a manda yama chargé d’affaires di Venezuela relaciona cu e impasse, y a menasa cu represalia pa e accion di Venezuela. Minister di Exterior Hulandes, Caspar Veldkamp, a bisa cu e kier clarificacion riba decision di e pais pa limita e cantidad di diplomatico Hulandes eynan na tres y restringi nan movemento. El a bisa cu definitivamente ta bay tin un respuesta retaliatorio. “Awo nos ta considerando, tambe hunto cu nos partnernan di UE, con e contra-reaccion ta bay mustra.”
Minister di Exterior Venezolano, Yvan Gil Pinto, a acusa Hulanda, Francia y Italia di “duna sosten na gruponan extremista y nan interferencia den asuntonan domestico.”
El a skirbi cu si no respeta soberania Venezolano, ta bay emiti mas sancion. Gobierno Venezolano a bisa cu ta bay tuma “accion necesario” pa “garantisa su stabilidad, soberania y e caminda pa paz y prosperidad logra pa nos propio esfuerso.”
