Directora di departamento di Asunto Economico, Maria Dijkhoff-Pita a referi brevemente tocante e politica economico cu gobierno ta bin implementa internamente durante e pandemia di Covid-19. E funcionario a trece dilanti cu constantemente mester adapta nan plan economico pa motibo di e situacion di e virus aki.

“Esaki ta nifica cu aunke nos por tin hopi plan, pero manera boso nan sa nada ta skirbi. Nos tur ta haci e cambionan historico dia pa dia,” asina Dijkhoff-Pita a bisa durante e di 30 Conferencia di Turismo Aruba (CATA) pa e region Latino Americano organisa pa Aruba Tourism Authority (ATA) di forma virtual diamars ultimo.

Plan y cambio

El a splica cu for di 2017 gobierno a prepara algun plan strategico nacional cu un vision pa 2030 pa percura e desaroyo di Aruba, no solamente economico, sino social y medio ambiental. E plan aki tabata manera un guia pa e implementacion di e metanan di desaroyo sostenibel (SDGs) di Nacionnan Uni.

Den conexion cu esaki, minister di Finanzas y Asunto Economico, Xiomara Maduro a bin cu su politica di un Economia Fuerte y Reciliente 2019/2020. Dijkhoff-Pita a bisa cu na 2018, ora cu nan a traha riba a politica aki, nunca nan por a pensa con importante e palabra ‘reciliente’ a bira na aña 2020.

E maneho aki a identifica 6 sector prometedor cu el a cualifica como sectornan cu nan a considera atractivo pa inverti y tambe pa exportacion di productonan y servicio di Aruba. El a reitera cu turismo tabata e sector mas prominente di e seis sectornan describi, manera agricultura, logistica, economia circular y economia di conocemento.

Pero tur e plan aki cu tabata busca fortalece nos economia y haci uno sostenibel, teniendo ser humano central, unda a tene cuenta cu medio ambiente. Pero tambe stimula e inversionista cu e proposito di bin cu actividad economico nobo cu por crea fuente di trabao y mehora e calidad di bida di nos hendenan.

Sinembargo e plan aki tabata masha bunita riba papel, pero mester adapta nan urgentemente pa motibo di e Covid cu a bira un sorpresa. Esaki a haci cu gobierno a dicidi di prepara e aña aki, meymey di e pandemia, un Master Plan bao e nomber di Reposicionando Nos pais. E plan aki su meta ta esun di acelera e reactivacion economico na corto y mediano plaso pa reacciona riba e efectonan di e pandemia di Covid-19.

Directora di departamento di Asunto Economico a bisa cu e virus aki, no solamente a bin pa altera henter mundo, sino cu a trece cune, consecuencianan desastroso pa salubridad y economia di Aruba.

Perspectiva Economico

Dijkhoff-Pita a bisa cu e perspectiva economico di 2020 pa 2023 a sufri varios adaptacion pa consecuencia di Covid su impacto den nos pais.

El a laga sa cu e cifranan cu normalmente nan ta adapta dos biaha pa aña, awor nan mester adapta e cifranan aki cada luna. “Pasobra tin hopi variabel incierto. E incertidumbre ta hopi grandi,” el a declara dilanti un publico virtual cu a sigui e conferencia di CATA.

E hecho cu Aruba su economia ta depende mas cu un 70% di industria turistico – segun e funcionario- y tambe e hecho cu nos a bin cu un lock down na final di maart te luna di juni, a produci un impacto den nos economia hopi fuerte.

E impacto sin precedente aki a wordo sinti den henter nos sector turistico, comercio y hogar. Pa aña 2020 nos producto interno bruto (DGP) tabata programa cu un crecemento di 5.2%. Pero debi na e situacion di e Covid crisis, nan mester adapta e cifra aki, y awor e cifra ta registra como un caida den termino nominal di un 28.3% di nos GDP compara cu 2019.

“Un cos cu nunca nos a wak den nos economia,” segun Dijkhoff-Pita.

El a indica cu otro aña den nan perspectiva economico di 2021, nan ta calcula un recuperacion chikito of mas bien un ‘mehora’ di un 5.4%, compara cu 2020 den nos GDP. E cifra aki ta uno hopi leu di locual tabata Aruba su cifra pa 2019.

Analisando e panorama aki, e ta haya cu nos economia lo conoce un recuperacion hopi slow durante 2021 y 2022. E proceso di aceleracion pa recuperacion di nos economia lo depende principalmente, con rapido nos lo por bay bek na e cifranan produci pa nos industria turistico durante 2018 y 2019. El a remarca cu esaki teniendo na cuenta cu 2019 a bira un aña hopi productivo pa nos sector turistico.

Flexibilidad economico

Dijkhoff-Pita a bisa cu Aruba a mustra den pasado hopi flexibilidad riba su economia cu a permiti cu nos pais por a pasa e crisisnan hopi rapido, entre nan esun di 11 september 2001, caso di Natalee Holloway y crisis financiero di 2008.

E funcionario a trece dilanti cu e crisis cu nos pais ta pasando aden actualmente debi na e situacion di e Covid local y internacionalmente, lo depende di e desaroyo di e pandemia. Pero e ta depende tambe riba comportacion di e turistanan y industria turistico mundial.

“Nos tin hopi fe y expectativa positivo riba e bon nomber di e producto di bon calidad cu Aruba ta ofrece….” el a declara. E hecho aki cu ta den man di e expertonan di ATA lo contribui pa reactiva nos economia.

Igualmente el a laga sa cu durante e ultimo lunanan aki Aruba, nos a siña hopi di e pandemia, entre nan con fragil nos ta y cu nos mester diversifica rapidamente nos economia. Pero apesar di esaki, sin duda den e proximo añanan nos sector turistico lo ta, nos recurso mas importante pa reactiva nos economia.

Na final el a haci un yamado na e socionan cu Aruba tin den e mercado Latino Americano cu ta promove y bende nos producto turistico. Pa nan sigui yuda nos aumenta y crece nos turismo cu ta un bunita producto cu hendenan capaz den e industria aki, locual ta contribui pa stimula nos economia.