Diputado Hennyson Thielman di Desaroyo Economico y Turismo a tene un discurso durante e Cumbre di Turismo Boneiro di Tourism Corporation Bonaire (TCB). Durante e encuentro desaroyo turistico y e vision pa Boneiro pa e añanan binidero tabata central.
Thielman a pone enfasis riba importancia di colaboracion pa realisa e vision di nos isla, manera cu a formula esaki den e Plan Maestro Strategico Turistico. Den esaki inclusion di nos comunidad local ta un prioridad.
‘Tin varios combersacion ta tumando luga cu sector di hospitalidad, cu como meta pa for di prome di januari 2023 hisa e salarionan den e sector aki te na por lo menos 1300 dollar pa luna. E sector turistico mester bira un ehempel cu otronan por sigui na nos isla. Turistanan ta bini pa e autenticidad di nos isla. Pa medio di tuma hende local den servicio, nos no ta halsa solamente calidad di bida di habitantenan di Boneiro, pero nos bishitantenan tambe ta haya un experencia autentico’, segun e diputado.
El a agrega na esaki: ‘Un cara fiho y ora reconoce nan na momento cu nan regresa nos isla un biaha mas, ta haci hopi den experencia di e turista. Desaroyonan den turismo mester bay reacciona rapido y facil riba e turista cu ta cualitativamente di balor halto, cu ta bini pa nos naturalesa, pa nos cultura y pa nos hendenan y cu ta dispuesto pa gasta placa na esaki, di manera cu bienestar di nos habitantenan i nos isla en general ta mehora pa e motibo aki.’
Desaroyonan pa futuro
E desaroyonan pa futuro awor aki ta enfoca riba acomodacion boutique di 4 y 5 strea y un nivel di servicio halto. Pa esaki Entidad Publico Boneiro den colaboracion cu stakeholdernan turistico a formula cierto criterionan pa acomodacion cu instruccion pa dunamento di permit. Ta bay nombra un organisacion independiente pa evalua e criterionan aki. Banda di esey Entidad Publico Boneiro ta inverti den formacion y treinen, di manera cu empleadonan local ta haya oportunidad pa studia bay un nivel mas halto y pa den futuro nan por tin beneficio financiero di esaki tambe.
