Dialuna diputado di oposicion Juan Requesens, a keda herida durante un protesta di parlamentarionan, na sede di defensoria di pueblo. E protesta a cuminsa como un rechaso na tribunal superior TSJ, pa asumi pa un periodo corto tur funcion di Asamblea Nacional.
Requesens a sufri un corta profundo riba su wenkbrauw, y pesey e mester a opera rapidamente via un cirugia menor. Primero Justicia, partido na cual e legislador ta pertenece, cu a organisa e manifestacion, a culpa colectivo Chavista di e atake aki. Oposicion ta acusa cu grupo cu ta apoya e gobierno di Maduro ta arma constantemente den manifestacionnan.
Diputado di oposicion ta solicita na defensor di pueblo, Tareck William Saab, pa apoya su solicitud di destitui magistradonan di Tribunal Supremo di Husticia (TSJ) cu a dicta sentencia, ora cu nan a dicidi asumi facultadnan di Asamblea Nacional y tambe a dicta encuanto eliminacion di inmunidad pa tur parlamentario.
Parlamentarionan ta pidi un condena di e decision aki, pasobra e ta un “ruptura di e hilo constitucional”, manera fiscal general Luisa Ortega a sigura algun dia pasa, prome cu e eliminacion parcial di sentencia ey. Pero dialuna e defensor a bisa cu segun e no tin ningun ruptura constitucional. “Bisami si ta existi un ruptura di orden constitucional, si e fiscal a reuni diasabra cu presidente Nicolas Maduro pa oranan largo (…) y eynan nan a papia tocante democracia y legalidad”.
Oposicion a yama pa un marcha diamars te parlamento, den centro di Caracas, unda normalmente e gobierno no ta permiti protesta di grupo di oposicion, y asina cuminsa cu proceso di pone e magistradonan afo, y tur cu a participa den e decision ey.
