Diputado Den Heyer ta sigui den funcion di diputado, cu tur confiansa di directiva y lider di partido Elvin Tijn Asjoe. MPB ta sumamente gradicido pa Nina den Heyer su dedicacion y tur loke el a haci pa Boneiro.
Siman pasa a bira conoci cu señora Nina den Heyer lo no participa na e eleccion binidero y cu otro aña e lo no continua su carera politico.
En berdad diputado Den Heyer a informa directiva di MPB di su decision pa no pone su mes eligibel den e proximo eleccion. Esaki el a informa directiva di MPB algun siman pasa.
Apesar cu directiva di MPB ta lamenta cu un gobernante capaz y sigur como hende muhe manera Nina lo no sigui den politica, MPB ta compronde y respeta Nina su decision y ta sostene den esaki.
Directiva di MPB ta sumamente orguyoso di e trabounan desplega pa Nina cu MPB for di 2013, pero tambe como diputado pa MPB riba area social pa casi 5 aña. Nina a logra hopi pa Boneiro y a toca curason di hopi hende. Pa esey directiva ta contento cu Nina ta sigui como diputado aworaki. Pa e periodo binidero MPB ta sigui traha hunto pa logra miho bienestar pa su isla.
