Un diplomatico Mericano, kende a bisa cu a sufri dolor di cabes y perdida di memoria bou circunstancianan misterioso mientras e tabata staciona na China, a priminti ayera di entrega su celebro como donacion na investigadonan di herida celebral.
Mark Lenzi, di 44 aña di edad, ta un adicion inusual na varios miles di otro, incluyendo hopi ex- hungadonan di NFL cu a sufri concusionnan durante nan carera, kende anteriormente a firma acuerdonan pa permiti nan celebro wordo studia despues di nan morto pa e CTE Center na Boston University (BU).
Un ingeniero di siguridad pa Departamento di Estado Mericano, Lenzi tabata entre un cantidad di diplomatico kende a ser treci bek cas aña pasa for di e consulado na Guangzhou, China, despues di reporta su sintomanan, pa cual ainda no tin splicacion.
Departamento di Estado no a mira un conexion entre e diplomaticonan ey, y 26 trahadonan na embahada Mericano na Cuba, kende a retira na 2017 despues di reporta sintomanan, incluyendo esunnan consistente cu concusion.
“E ingeniero den mi kier yega na e fondo di e sorto di concusion aki, y kico exactamente a pasa cu mi”, Lenzi a bisa mientras tabata firma e promesa na Boston, cu representantenan di e Concussion Legacy Foundation, un organisacion cu ta colabora cu investigadonan di BU door di recluta dunadonan y publicando e riesgonan asocia cu trauma di cabes.
Lenzi awo ta traha na un oficina di paspoort di Departamento di Estado na su nativo New Hampshire. El a bisa cu e y su casa a cuminsa scucha zonidonan straño den nan apartamento na 2017, y despues a desaroya sintomanan consistente cu concusion. Den un entrevista cu AP, el a bisa cu inicialmente e no a asocia e zonidonan cu e sintomanan, keriendo cu e dolor di cabes a resulta pa motibo di smog.
Lenzi no a wordo identifica pa oficialnan Mericano como un persona sufriendo di heridanan similar na e diplomaticonan na Cuba.
Departamento di Estado a bisa diabierna cu di 15 diplomatico of miembro di famia di China, cu a ricibi evaluacion medico adicional na Merca, 14 a ser haya sin sintomanan manera esunnan di Cuba, y e otro caso no a wordo determina.
AP a reporta cu un reporte interino di FBI no a haya evidencia cu onda di zonido lo por causa e heridanan di e personal na Cuba. E departamento a bisa cu su investigacion ta continua y cu su maximo prioridad ta e siguridad di personal Mericano.
Hallazgonan preliminario pa un team na Universidad di Pennsylvania y publica den e Journal of the American Medical Association riba 24 personal afecta na Cuba a mustra cu nan tabatin problema sensorial y di memoria similar na disfuncion celebral mira cu concusion.
Mas di 5mil persona a priminti cu lo dona nan celebro na investigadonan di BU, y nan 716 a ser dona caba. A realisa mas di 360 diagnostico di encefalopatia traumatico cronico, CTE pa su siglanan na Ingles, representando mas di 70 porciento di casonan confirma mundialmente, e fundacion a bisa.
