Algun siman atras Bon Dia Aruba a reporta turtuganan morto riba Eagle Beach. Fundacion Turtugaruba a pidi informacion pa cu e maneho di gobierno ora ta trata di naturalesa. Nos a acerca Isabel Dammers, miembro di directiva di Departamento di Infrastructura y Planificacion (DIP) pa duna un splicacion.

Tabata trata di un bar nobo cu a wordo construi na Eagle Beach unda 6 turtuganan Driekiel a wordo trapa cu autonan. Segun Fundacion Turtugaruba, gobierno a duna permiso pa e bar keda habri durante oranan den dia so. Pero ta notabel cu e bar aki ta keda habri te oranan di anochi. Y asina strobando e turtuganan cu tin nan neishi eybanda.

Convenionan di huur pa kiosconan banda di lama

Sra. Dammers ta splica cu el a pidi e convenionan di huur pa por confirma si tin algun condicion cu e huurdo ta mara na dje. Redaccion lo tuma contacto cu sra. Dammers atrobe ora confirma e terminonan specifico cu e convenionan di huur ta stipula.

Segun sra. Dammers, e convenionan cu a wordo cera ta bin cu condicionnan cu ta stipula cu mester tene cuenta cu e nivel di luz durante temporada cu turtuganan ta pone webo riba e beach.

Sinembargo e ta bisa cu ‘e convenionan no a pasa directamente den mi man,y ta den mi ausencia esakinan a wordo cera. Mi lo kier verifica e contenido prome pa specifica kico nan ta encera.’

Fundacion Turtugaruba a tuma contacto cu DIP, segun sra. Dammers. Y cu na e momento ey el a bisa cu, ‘un kiosco en particular mi tabata na altura di dje,y ta esun mas pa zuid. Mi a tuma contacto cu e huurdo pa spierta su persona cu e no ta wantando su mes na e condicionnan’.

Sra. Dammers a splica cu normalmente strandpolitie ta pone baricada pa evita cu auto of hende trapa riba e neishinan. Tambe e ta agrega cu: “Ora e turtuganan ta traha neishi, luz mester ta minimo. Pa motibo si tin hopi luz durante anochi, e turtuganan ta sali bay unda tin mas luz. E turtuganan naturalmente ta bay unda tin luz pa motibo cu nan sa den ki direccion lama ta despues cu nan a nace.”

El a conclui cu ‘tambe mester tin personanan cu ta vigila e situacion di e turtuganan, cual e boluntarionan di Turtugaruba ta haci.’

Turtugaruba ta pidi mas transparencia

Presidente di Fundacion Turtugaruba Edith van der Wal ta expresa cu ta berdad cu tin cierto condicionnan pero cu no ta conoci kico esakinan ta exactamente y con nan ta hinca den otro.

“Pa asina haya sa kico ta posibel y kico no ta posibel mester ta mas habri y transparente. Si bo ta sigur cu algo no ta permiti y e ta comunica claramente, hende por haci mas esfuerso pa combati problemanan. Mi ta haya cu mester ta mas cla cu kico mag y kico no mag.”

Respet pa naturalesa

Sra. Van der Wal a clarifica cu ta primordial pa respeta naturalesa. “Mester anda cuidadosamente cu desaroyo na nos costa pasobra e turtuganan no tin otro luga pa traha nan neishi.”

E ta preocupa pasobra ya caba por wak cu e Driekielnan na Palm Beach no ta pone neishi eynan mas. Nan a splica cu ‘den e area di Ritz Carlton y Fisherman Huts tin poco ainda pero por a nota cu e cantidad a baha drasticamente’.

Un di e puntonan cu por señala cu na Eagle Beach tambe e cantidad lo baha ta e situacion actual cu Kokoloko bar, segun sra. van der Wal. “Pa nos, si nan cuminsa haci kico nan kier otronan lo bin despues y e situacion lo bira mas grave.”

Importancia na nivel regional y internacional

Fundacion Tortugaruba ta forma parti di e Wider Caribbean Sea Turtle Conservation Network (WIDECAST). E network aki ta consisti di tur iniciativa di paisnan Caribense y den costa Caribense cu tin como meta pa conserva turtuganan. Segun sra. Van der Wal, hunto cu e network aki Tortugaruba ta realisa diferente estudio riba turtuganan na Aruba.

Por ehempel sra. Van der Wal ta splica, ‘recien nos a haci un estudio riba e temperatura den neishinan di turtuga. E ta interesante pa sa cu ora turtuganan pone webo nan no ta di sexo masculino ni femenino.’ Sra. Van der Wal a splica cu den e di tres of di cuater siman despues di e incubacion e temperatura di e neishi ta determina e sexo di e turtuga. “Y kico ta interesante di e estudio aki ta cu nos a haya sa cu e temperatura di e beachnan na Aruba ta mas abou, cual ta haci cu e turtuganan ta nace mas di sexo masculino cu sexo femenino.”

Sra. Van der Wal ta sigui splica cu esaki ta hopi importante regional y internacional.

“Hopi di e beachnan rond mundo ta produci mas turtuga di sexo femenino. Y den e totalidad por wak cu tin mester di mas turtuga masculino. No obstante cu nos poblacion di turtuga ta mas chikito, nos ta haya hopi interes ora nos atende simposio regional. Ya cu hopi di e beachnan na otro pais ta ‘produci’ mas turtuga di e sexo femenino.”

Sra. Van der Wal a finalisa bisando cu: ‘nos tin un posicion hopi importante internacionalmente. Y nos mester cuida di nos beachnan no solamente pa nos mes pero pa e turtuganan y pa e ecologia di e planeta.’