ORANJESTAD – Pa medio di Landscourant no. 26 fecha 21 di december 2018, a publica e Decreto Nacional no. 1 fecha 21 di december 2018 (Landsbesluit no. 1 d.d. 21 december 2018). Den e decreto aki ta anuncia cu tin un Plan di Desaroyo Teritorial / Ruimtelijke Ontwikkelingsplan (ROP) y un Plan di Desaroyo Teritorial cu regulacion / Ruimtelijke Ontwikkelingsplan met Voorschriften (ROPV) den preparacion pa henter teritorio terestre y acuatico di Aruba. E ROP nobo lo mester drenta na vigor dia 7 di mei 2019.

Garantisa calidad di bida, preserva naturalesa di Aruba y cu esaki limita crecemento no controla di acomodacionnan pa estadia y condominio como tambe preserva y proteha flora y fauna nativo cu ta bou menasa di extincion, ta algun punto di salida den e ROP 2019 cu lo fungi como cuadro general pa e prome ROPV di Aruba.

Ta wordo considera necesario pa anticipando riba e realisacion di e ROPV tuma un asina yama “Decision di Preparacion” (voorbereidingsbesluit) conforme articulo 29 di Ordenansa Nacional pa Desaroyo Teritorial / Landsverordening Ruimtelijke Ontwikkeling (LRO). E Decision di Preparacion aki ta duna, den luz di e ROPV den preparacion, cierto limitacion na construccion, ehecucion di trabounan den of riba tera of na construccion existente door di rekeri un “Permiso di Planificacion” (aanlegvergunning).

E Decision di Preparacion ta encera cu pa e siguiente actividadnan, riba cualkier parcela mas grandi cu 750 meter cuadra den teritorio terestre y acuatico di Aruba, un Permiso di Planificacion” ta rekeri:

  • minamento, cobamento, yenamento, egalisamento of rementamento di subsuelo;
  • Construccion di caminda of otro endurecemento di subsuelo;
  • Ponemento di cabel y tuberia, construccion, instalacion of aparatura riba of den tera;
  • Trahamento di waf of luga di mara;
  • Kapmento/rozamento di mata y otro vegetacion;
  • Ehecucion di obra y trabounan cu ta afecta gestion di awa y nivel di awa subteranio;
  • Demolicion di edificio;
  • Trahamento di dump y deposito di metal bieu.

Terenonan destina pa construccion di cas otorga den erfpact despues di dia 21 di december 2018 ta exonera di e obligacion di permiso.