Haime Croes, Director di Directie Infrastructuur en Planning (DIP), dialuna pasa a tene un conferencia di prensa pa medionan local y a trece dilanti dos topico di interes pa comunidad.
Prome topico tabata trata tocante ceramento di ROPV, cual Croes a expresa cu a cera dia dos di december ultimo. El a bisa cu te dialuna tabatin e cantidad di 35 remarke entrega, cu pa nan ta hopi bon mirando cu ya nan a custuma caba cu diferente remarke, pero nan tabata spera mas.
Tambe el a comenta cu ayera nan a cuminsa habri audiencia pa e proceso di remarke cu a termina. Esakinan lo tuma luga dia 9 di december di 4or di atardi pa 6or di atardi na DIP, 5 y 6 di december di 9or di mainta pa 11or di mainta den sala di conferencia grandi di DOW.
Croes a bisa cu nan ta spera cu e hende cu a entrega nan remarke y si tin algun argumento pa haci, nan lo ricibi e oportunidad pa reuni cu DIP durante 20 minuut pa trata cualkier preocupacion y alabes intercambia pensamento. Pa DIP ta hopi importante pa nan por evalua y trece e concepto final di ROPV, cual nan ta spera lo pasa lo mas pronto posibel.
Di otro banda, Croes a menciona e aspecto di rancho of kiosconan cu nan inscripcionnan ta den termino. Croes a señala cu DIP ta hopi contento cu e ranchonan, cu 65 hende a bay pa inscribi nan rancho. Nan a entrega tur loke DIP a pidi nan y el a menciona cu ta hopi positivo. Ainda prome cu mita di januari, e otronan por hiba e registracion di nan ranchonan.
Croes a bisa cu importante ta pa mustra cu e parti aki ta registracion, pero den e cuadro di , DIP a bisa cu loke ta para ta keda y si e doñonan kier haci uzo di dje pa haci mas chikito tambe por, pero e idea no ta pa bin cu mas y esey ta e parti cu nan kier regula.
Si tur cos ta bon a base di rekisitonan cu nan ta pidi, e ora nan por paga e cantidad di 5 florin pa cada metro cuadra pa cada aña. Mayoria di e ranchonan ta di 40 pa 50m y si e persona tin mas, e tin cu multiplica pa cinco pa haya e prijs cu tin cu paga pa aña.
