E siman cu a pasa y siman venidero lo tin tres producto di Departamento di Infrastructura y Planificacion (DIP) cu lo haya atencion special. Pa esunnan cu kier expande nan tereno erfpacht, pa esunnan cu a pidi tereno comercial y pa extension di contracto.
Ronny Maduro, coordinador di DIP a informa cu ta bay trata e ‘uitbreiding residencial’ expansion di residencia pa esunnan cu kier un tiki mas di e tereno di locual nan tin, y cu a haci peticion anteriormente.
E siguiente producto cu DIP lo enfoca riba dje siman aki lo ta pa contractnan di erfpacht cera cu hende cu ta yegando edad di 60 aña, unda cu fecha lo caduca, tambe lo mester aplica cu ta desea pa extension di e contract ey. Y pa ultimo tin e tereno comercial. Pa hende cu ta haci peticion anto ta cay den remarke pa un.
“Nos tin un siman completo cu nos a ricibi cliente cu a yega di haci peticion pa esey. Nos kier gradici tur hende cu a duna interes na esaki. E interes ta grandi y ta ripara e positivismo y contento cu cliente a haya”, Maduro a expresa.
Tur esunnan cu producto di expansion di tereno, persona cu a haci peticion anteriormente na DIP cu no haya contesta, por pasa DIP pa reconfirma nan interes riba dje y nan lo cuminsa e proceso.
DIP ta consciente cu tin retraso riba peticion y nan kier trata tur, pa haci esey mester inventario di esunnan interesa y tur cu a bin den remarke lo haya contesta ‘lo evalua tur peticion a base di ROP’. El a bisa cu tur hende lo haya contesta den termino rasonabel. Tur peticion lo ser trata manera ‘first in first out’.
Si un persona su contract ta bay caduca, y e persona ta mustra interes den erfpacht, nan mester oficialisa cu nan tin interes. Tin cu pasa DIP haci e inscripcion.
E di tres peticion ta e tereno comercial puro. “Tur hende cu a haci peticion na 2008 te cu awo, nos ta bay purba tende mas habri pa no bin bruhamento. Si bo a haci peticion dos siman pasa, haci pa reconfirmacion.”
Pa DIP por procesa, tin nan manera di traha y rekisito, den e prome caso ta ‘first in first out’. E ta bisa cu tin peticion cu ta bieu y no ta tur dato y documento ta actualisa hunto cu peticion y ta dificil pa trata.
Nan lo inventarisa y lo haci posibel pa tur hende cu a haci peticion di 2008 te cu awo por inscribi pa confirma nan interes den e tereno comercial pa eherce nan proyecto desea.
Pa finalisa, Maduro a menciona cu pa haci e proceso mas facil, persona por bishita e website dip.aw pa formulario y informacion stap pa stap. Cua documento, con pa yena esaki y kico tur ta spera di e proceso cu tin cu cumpli cune y por manda esey na email adres.
