Bon Dia a publica cu tabata planea pa otorga e terenonan anto Directie Infrastructuur en Planning (DIP) a conseha contra esaki. Awor pa medio di un relato di prensa, DIP ta confrima cu ta wardando e decreto y por lo pronto no lo otorga e terenonan aki.
Departamentonan di gobierno ta trahando tambe riba e delineacion di e area pa fiha unda e area proteha ta caba y unda ainda tin espacio pa terenonan pa otorga pa vivienda. Segun informacion di un otro fuente den ministerio, Bon Dia Aruba a compronde cu e terenonan cu kier destina pa erfpacht no ta cay den e area di naturalesa (wetland).
Segun directora di DIP sra. Isabel Dammers, e strip di parcela cu ta wordo discuti over di dje akinan ta na nomber di land Aruba. Nos a publica diaranson cu un di e personanan cu ta riba e lista di privilegio pa haya esakinan lo ta e yiu di locutor Stanley Arends, Jair Arends y tambe su pareha Aisha Arana. Dammers: “Na Kadaster bo por pidi inzage riba nomber di cualkier persona, fundacion of compania pa haya sa ki propiedad nan tin riba nan nomber. E personanan menciona no tin niun di e parcelanan cu ta den discusion riba nan nomber.”
DIP: No tin tereno otorga den Saliña Malmok
Tumando nota di informacion cu a sali publica riba rednan social y den medionan di comunicacion DIP ta informa lo siguiente encuanto e area di Malmok via relato di prensa. Den e plankaart di e Ruimtelijk Ontwikkelingsplan (ROP) delineacion di areanan (plangrenzen) ta defini detayadamente, ya cu nan ta marca como delineacion global. E texto di e beleidsplan ta indica tambe cu ki margen y bou di cua condicion por desvia di e plangrens aki. Alavez pa basta tempo caba tin proceso andando pa haci ahuste na e ROP segun DIP ta informa.
No tin decreto ministerial
Ahuste di plangrenzen lo ta entre otro consecuencia di esaki. Segun DIP, e terenonan en cuestion den e ROP ta destina como saliña/wetland y door cu nan ta cai na rand di plangrens por ta eligibel pa wordo otorga bou di un decreto ministerial conforme e ROP actual. Adelantando riba e ahuste di areanan defini globalmente den e plankaart di e ROP entre otro na Malmok a tuma lugar midimento di algun tereno. Sinembargo segun DIP, ainda no tin un decreto ministerial pa desvia for di e ROP y no a tuma lugar niun otorgamento den erfpacht di e terenonan en cuestion tampoco.
Nan ta laga sa cu na e momentonan aki tin trabounan tumando lugar en coperacion cu diferente departamento pa ehecuta e mocion di Staten y pa decreta 16 area di naturalesa como reserva di naturalesa (natuurreservaat). E saliña di Malmok ta un di e areanan aki. E grens di e area na Malmok cu lo bira reserva di naturalesa ta wordo defini mas en detaye ainda. Por informa adicionalmente cu por lo pronto no lo conseha pa otorga e terenonan aki. Tambe a pidi Kadaster pa en caso cu por tin cualkier peticion pa midimento pendiente den e area pa debolbe esaki na DIP sin ehecuta.
Concluyendo DIP mester remarca cu ta di lamenta cu nomber di un empleada ehemplar di DIP a wordo menciona den publicacionnan sin cu ta necesario y cu tur informacion encuanto derecho di erfpacht otorga ta publico y obtenibel na hypotheekkantoor di Kadaster.
