Departamento di Infrastructura & Planificacion (DIP) no a para e trabou di cobamento den cercania di Sero Cristal. Esaki Isabel Dammers, miembro di management team di DIP, ta bisa Bon Dia 24.
E cobamento ta riba terenonan priva y aunke segun ley ta trata di un area destina pa naturalesa, gobierno no tin e instrumentonan legal pa actua contra actividad comercial asina riba tereno priva pa proteha e naturalesa. DIP tambe ta enfatisa cu te awor nan no a constata cu e companianan ta cobando pafo di nan tereno. E terenonan no ta cubri Sero Cristal y niun tin permiso pa coba den sero aki tampoco.
Tin dos compania activo den e area: Best International Group (BIG) na Sero Plat (banda di Jaburibari) y Calo Romano na Budui (banda di lama, patras Bushiribana).
E compania Calo Romano no ta e doño di e tereno, solamente nan ta explota esaki. E doño ta Brandford Investments, un compania situa na British Virgin Islands. Brandford a cumpra e tereno na 2000 for di M.A. Eman pa un suma di casi 2 miyon florin. E tereno ta masha grandi, 139.200 m2, y ta bay te direccion di lama, mastanto siguiendo e rooi di Budui.
Ora DIP a controla e tereno diasabra pasa despues di ricibi un keho anonimo via email cu tin compania cobando pafo di nan tereno, nan a constata cu Calo Romano a uza un parti pafo di nan tereno pa warda nan ekipo. E parti aki ta tereno di gobierno pues no ta permiti. Pero nunca gobierno den 16 aña cu e compania ta activo den e area aki, a actua contra esaki. Pues segun sra. Dammers e ta dificil awor pa kita e tereno despues cu gobierno a tolera e situacion pa asina hopi aña.
Awor ta purbando pa wak si e doño ta dispuesto pa duna gobierno un otro pida di tereno den e rooi unda e naturalesa ainda no ta destrui. E intercambio aki ta miho, segun sra. Dammers, pasobra ainda por salbarguardia un pida naturales den e area aki.
E otro compania BIG tambe ta e doño di e tereno na Sero Plat. E ta un compania local cu a cumpra na 2014 e tereno di 10.9300 m2 for di M.J.C Tromp pa un un suma di 1.2 miyon florin.
Investigacion efecto cobamento
Bon Dia 24 a puntra sra. Dammers lo por tin efecto negativo di e cobamento pa Sero Cristal y e resto di e area. Pasobra tin un par di cas eynan pero tambe tin preocupacion cu e cobamento lo por tin efecto pa suelo (por bira mas debil), awa (rooi, grondwater) pero tambe pa naturelsa y animal. Tin habitante cu ta keha di e molester di e trucknan transportando e santo y tambe otro vehiculonan grandi. Nan a yama polis entre otro pa motibo tambe cu e trucknan tin biaha ta core hopi duro, trece situacionnan peligroso riba e camindanan di santo.
Pa mayoria di parti segun DIP e poco habitante cu ta biba den e areanan aki kisas lo por tin molester di hopi stof of di trafico. Pero na otro banda, sra. Dammers ta bisa cu esaki tambe ta aplicabel pa otro camindanan riba e isla tambe. Lo mester un onderzoek mas profundo pa por evalua kico por sosode por ehempel ora cu awasero cay si esaki por trece algun peliger pa motibo di cobamento rond di seronan, e ta admiti. Pero e ta trabou cu ta cay bou di un otro departamento, DOW, pa investiga si tin cierto peliger, e ta bisa.
Den caso cu ta constata daño y of kier preveni, habitante of grupo cu kier conserva naturalesa, semper por entama un caso civil tambe. Segun un di e companianan, Calo Romano, nan ta trahando ‘sin haci daño inecesario na naturalesa’.
(riba potret, sra. Isabel Dammers splicando Bon Dia 24 e situacion na Sero Cristal)
Por lesa e storia completo cu reaccionnan tambe di e companianan den Bon Dia Aruba di mañan.
