Departamento di Infrastructura y Planificacion, mediante un comunicado di prensa, ta desea di informa comunidad di Aruba ariba un punto importante cu tin basta pregunta riba dje, esta e proyecto di St. Regis Hotel.
Segun e relato di DIP, e tereno unda e St. Regis Hotel ta construi, originalmente ta parti di un tereno, propiedad (eigendom), desde epoca colonial. Na 2006, e parcela a wordo converti den erfpacht y dun’e den erfpacht bao condicion cu ora e hotel wordo construi, mester rediseña e parke pa publico riba e parcela na banda, manera den relato y manera e figura ta ilustra.
Pues a pesar cu e tereno tabata eigendom y despues a wordo converti den erfpacht, gobierno a percura pa crea mas espacio di beach pa comunidad por medio di e parke na banda cu a wordo rediseña, segun DIP a splica.
“Pa informa comunidad corectamente, e pilon blauw ta demarca e limite di e tereno,” DIP a bisa. “Manera ya menciona, e embeyecemento di e parke, segun e otorgamento di e tereno na 2006, tabata un obligacion. Esaki a wordo concretisa den un acuerdo, cu e construccion di e strandpolitie, y baño nan pa zwemles. Esakinan lo wordo reconstrui na otro sitio den e parke manera ta ilustra den e figura.”
Segun DIP, esaki ta parti di un plan mas amplio di gobierno pa crea mas espacio riba beach, y tambe pa ofrece mas espacio pa e publico local considerando limite di e tereno disponibel. E ehecucion di e parke y e realocacion di e edificio nan ta den pleno proceso. Pues gobierno a percura pa crea mas espacio di beach pa comunidad.
“E comunicado ta duna informacion veridico y transparente pa mantene e comunidad debidamente informa,” DIP ta menciona.
“Resumiendo, e tereno unda St. Regis ta ubica desde e pilon blauw riba figura adjunto, ta riba nan tereno. Parti di beach cu tabata eigendom a wordo usa pa forma e parcela, y na otro banda a percura pa crea mas espacio pa beach pa publico.”
