Durante un conferencia di prensa ayera mainta, director di Directie Infrastructuur en Planning (DIP), Haime Croes hunto cu minister di Asuntonan di Desaroyo Teritorial, Infrastructura y Medio Ambiente, Marisol Lopez Tromp a duna di conoce cu e departamento aki lo bay cera durante varios dia, pa cuminsa cu proceso di automatisacion y otro cambionan.
Croes a menciona cu e prome departamento cu a cuminsa cu automatisacion tabata Infra team y esey tabata e prome paso pa henter ministerio (departamentonan di Kadaster, DOW y DIP) bay den direccion digital.
Asina mes, el a comenta cu te ainda e proceso ta cana y na e momentonan aki ta bay pa e di dos fase di e proyecto, cu ta cuminsa mañan diaranson 5 di februari. Aki lo bay cu tres proceso pa yega na final, cu ta aproximadamente pa luna di juli of augustus, pa asina por haya un Infra eficiente.
Na prome instante, Croes a declara cu a dicidi cu ta bay haci entrante 5 di februari pa fin di luna tres cos pareu. Lo bay cera e departamento pa publico, pero e publico por haya contacto cu nan via e-mail y dos telefon di contacto. Tambe nan lo cuminsa cu e verbouwing di DIP pa bay den sistema account management y hunto cu esey ta bay bira un departamento cu no lo depende di otro mas y nan lo haya un sistema nobo di network.
Di mesun manera, Croes a informa cu lo bay duna su trahadonan curso pa tambe cambia e manera di duna servicio. Esey ta exigi cambio di mentalidad cu den e tres siman aki, di dia 4 pa 14 di februari, nan ta bay cambia e parti di automatisacion; di dos parti nan lo trece un sistema nobo; y di tres nan ta bay cu curso.
Ademas, den e proceso nobo, Croes a manifesta tocante hende cu no sa bon con pa traha cu computer, nan tin un balie pa e hendenan aki cu mester wordo guia pa hinca formulario den computer.
