Directie Infrastructuur en Planning (DIP) ta anuncia cambio den procedura pa kavel di Carnaval pa Carnaval 70. Cambionan ta pa salvaguardia Privacidad di Peticionarionan.

E aña aki pa prome biaha DIP ta publica e maneho di Kavel riba www.dip.aw. E maneho aki ta consisti di informacion detaya di proceso y procedura pa bin na remarke pa haya un precariovergunning pa Kavel.

Cambionan pa Carnaval 70:
 Manera tur aña, e ganadornan ta ser selecta por medio di un sorteo publico den presencia di Notario. Anteriormente e lista oficial di ganadornan incluyendo e nombernan completo y adres tabata wordo menciona door di Notario y e informacion tabata wordo publica. Pa proteha privacidad di peticionarionan a dicidi di implementa cambio den esaki.

E aña aki nomber y adres di e ganadornan di kavels lo no ser divulga publico mas, incluyendo demas informacion sensitivo di e ganador, manera ID nummer, persoonsnummer, email, etc. Lo ser proteha segun e maneho nobo.

Den lugar di esaki cada peticion tin un number y na momento cu e wordo saca for di tombola e mesun number ey ta bira number di Kavel. Esaki kiermen cu lo no tin e opcion di selecta un Kavel di preferencia riba mapa. E number aki lo ser uza pa identifica e ganadornan. Esaki lo ta e unico informacion publico. Den e proces-verbaal traha door di e notario lo registra solamente number di Kavel. Pa esnan cu ta desea di mira e proces-verbaal por pasa libremente na oficina di DIP dia 17, 18 of 19 di Januari entre 8:00am te cu 11:00am.

Fecha di Loting

Fecha di loting lo tuma luga diabierna dia 12 di Januari 2024 na DIP. Pues, ultimo dia pa entrega peticion ta diahuebs 11 di Januari. Dia 9 y 10 di Januari porta nan lo keda habri te cu 6:00pm y diahuebs dia 11 januari, lo tuma peticion te cu 6:30pm

Puntonan di Atencion:

Cada ganador lo ricibi maximo 1 Kavel. Si e nomber di e mesun persona Sali mas cu 1 biaha, e prome biaha so ta valido y esey lo wordo otorga. Esaki tambe ta aplica pa personanan cu ta biba na e mesun adres.

Si e mesun adres sali mas cu 1 biaha, e prome persona cu registra na e mesun adres ta esun cu lo ricibi e precariovergunning pa Kavel.

Por cuminsa pone trailers 1 siman prome cu e parada di Carnaval y mester kita trailers dentro di 1 siman despues di Carnaval.

Si bo persona ta un ganador di Kavel, ta pidi por favor pa keda pendiente di telefon pasobra lo bo haya un yamada for di DIP informando e siguiente pasonan cu mester tuma pa ricibi e precariovergunning di Kavel. E ganadornan di kavel mester tin un COPIA DI ID Y UN COPIA DI PERSOONSNUMMER.

Pa esnan cu haya kavel y ta desea di pone tent, lo mester pone propio tent. E aña aki DOW lo NO tin tent disponibel pa huur.

Bendemento di kavels ta acto ilegal conforme e ley Landsverordening Uitgifte Eigendommen (LUE) y Leges- en Retributie Besluit di DIP. Si bo persona a haya un kavel y no ta interesa mas pa tin un kavel, por entrega esaki na DIP.

Manera tur aña, por pone sea trailers of tent na Vondellaan. Den L.G. Smith Boulevard No ta permiti pa pone trailers, pues tent solamente.

Pa mas informacion ta invita interesadonan pa download e maneho di Kavel for di www.dip.aw.