DIP a perde caso na corte y mester duna contesta den 30 dia na Dr. Hendrick Marsman su proyecto

Dialuna ultimo, Dr. Hendrick Marsman a tene un conferencia di prensa dilanti di Directie Infrastructuur en Planning (DIP) pa trece dilanti e caso di su compania cu a pidi un bestemmingswijziging pa wooneenheden y commerciele eenheden.

Marsman a conta cu for di 2016 su compania “Portofino” a pidi un bestemmingswijziging pa wooneenheden y commerciele eenheden pero e no a haya un contesta di e departamento den e tempo ey, e bestemming actual segun el a conta, ta un fabrica di cement y den e ROPV nobo no ta permiti esey caminda a keda pendiente pa haya un bestemmingswijziging.

Añanan a pasa, minister di Infrastructura a cambia, pandemia a yega, investigacionnan na departamento a cuminsa tuma luga loke a causa full un retraso den caso aki.

Na october 2022, Marsman a dicidi di solicita un update riba su peticion di 2016 sin cu por a haya un contesta, na maart di 2023 el a logra reuni cu e directiva di e departamento, entre nan Haime Croes ken manera e ta sigura, a priminti’e cu pa september of october e lo a keda cla cu su caso.

Mirando cu lunanan a pasa, Marsman a dicidi di lanta un caso y un dia prome cu e caso lo a tuma luga, DIP a dun’e un contesta tocante e bestemmingswijziging di e fabrica di cement pa wooneenheden y commerciele eenheden, pero ora el a pidi e bestemmingswijziging a entrega un rendering “di un restaurant unico cu ta draai rond riba piso 7 y cu lo duna un experiencia diferente pa e turistanan, pero DIP a nenga e bestemmingswijziging dia 2 di november 2023 pa motibo cu den e taxatierapport di 4 di october 2022 a mustra cu a proyecta un restaurant den e piso 7 mientras cu solamente ta permiti restaurant den e parti di abao segun ROPV.

Igualmente, DIP a menciona na Marsman mediante un afwijzing cu erfpacht ta bay caduca dia 3 di december di e aña y a pidiele pa e renoba esey.

Cansa di tanto warda, abogado di Marsman a informa na DIP cu e proyecto di restaurant a cambia pa e piso di abao “ya cu nan a tuma tempo y studia full e ROPV y esey ta e unico remarke, nada lo stroba pa heroverweeg y duna e bestemmingswijziging den 30 dia,” el a bisa.

Pa 21 di december 2023 DIP a informa via un carta na abogado cu ta un bezwaarschrift y ta niet ontvankelijk y no por bay den bezwaar.

8 di maart di e aña aki Marsman a entrega un caso cu a tuma luga dia 4 y dia 17 hues a duna su veredicto.

Den e sentencia, cu Bon Dia Aruba ta dispone di dje, ta indica cu e compania Portofino di cual Marsman ta e doño, ta reclama cu nan plan di construccion y desaroyo a wordo afecta y retrasa innecesariamente debi cu DIP no a tuma un decision riba e bestemmingswijziging.

Land Aruba a califica ’ten onrechte’ e carta di Portofino di 15 di november como un bezwaarschrift y a declar’e niet-ontvankelijk, no ta existi ni un motibo pa no concede e bestemmingswijziging na Portofino y Land Aruba tambe ta obliga di coopera pa efectua e prolongacion di erfpacht y cambio di bestemming segun e acta notarial.

Land Aruba den su defensa a conclui cu e reclamo di Portofino mester wordo rechasa den sentido cu, prome a argumenta cu Portofino no tin interes urgente den su reclamo, cu tampoco a tuma contacto cu DIP y ademas cu restaurant a wordo proyecta pa e ultimo piso, despues nan a cambia pa e prome piso sin ahusta e bouwschetsen.

Den evaluacion di e sentencia, ta señala cu mester evalua si Portofino tin un interes urgente den e solicitud y corte a responde afirmativamente na esaki, ademas cu a keda suficientemente demostra cu Land Aruba no a resolve den un tempo rasonabel e solicitudnan di Portofino, sino den bispo di e caso a dicidi negativamente pa duna permiso pa e proyecto den e piso 7 aunke Portofino a bandona e plan ey y a pidi Land Aruba pa tuma na cuenta e decision nobo.

Ademas a manifesta cu tin suficiente fundamento cu ta hopi importante pa por cuminsa cu trabounan den e proyecto ya cu financiadonan ta menasa di retira.

Hues a ordena Land Aruba resolve den un tempo di 30 dia e solicitud di Portofino pa loke ta trata su bestemmingswijziging y tambe pa loke ta trata su extension di erfpacht, ademas si no ta cumpli cu loke hues a dicta tin un multa di 10.000 florin pa dia hasta un maximo di 500.000 florin.

Continuando cu e declaracion di Marsman, el a señala cu DIP mester ta un departamento pa facilita y sirbi e ciudadanonan y cu “ta parce cu hende cu ta bin afo so mag di traha edificio, nos como local ta haya tur sorto di obstaculo di nos gobierno,” el a sigura.

Igualmente e ta di opinion cu e hefe suplente Marylinn Dirksen “a menciona cu e lo boycott Portofino su proyecto, el a bisa cu a mi no tin placa y cu e kier wak mi fondonan, esaki ta un director incompetente cu ta pidi cos cu no ta su asunto y no por lesa e veredicto di hues.”

Pa su persona, prome minister Evelyn Wever-Croes ken ta encarga cu cartera di Infrastructura “tin miedo pa dirigi DIP y e mester pasa esaki pa otro minister, no tin tempo ni capacidad di maneha DIP, pero e no sa esey, e no sa di nada, p’esey mi ta yuda un tiki pa e haya sa.”

Marsman ta sigura cu pueblo ta pidi tereno pa nan traha nan cas, cu comerciantenan local manera su persona kier bay dilanti y construi, mas no haya boycott door di gobierno “cu hende incompetente ta dirigi departamento y lucha 2 aña y hiba gobierno corte pa gasta placa di pueblo.”

El a invita na esnan cu kier tereno of cu a pidi bestemmings wijziging of verlenging di erfpacht pa yama y manda e-mail na director Marylinn Dirksen y prome minister Evelyn Wever-Croes, “bisa nan cu nan tin 30 dia pa tuma decision y despues bo ta hiba nan corte pa nan mal maneho, nos ta fada, nos no tin miedo,” el a finalisa.