Despues cu a keda anuncia cu frontera aereo di Aruba cu Venezuela ta bay permanece cera pa tres luna mas, e prome vice-presidente di Partido Socialista Unido di Venezuela (PSUV) Diosdado Cabello durante su programa yama “Con El Mazo Dando” di dia 24 di januari ultimo a duna su reaccion riba e tema aki.

Den su programa di TV Cabello a critica Gobierno di Aruba riba e insistencia d sanciona Venezuela cu medidanan di restriccion cu ta impedi intercambio di vuelonan comercial entre ambos pais.

E prome vice-presidente di e partido chavista PSUV, a cuestiona e posicion aki recordando cu e isla di e Caribe Hulandes a usa como fuente di economia e contrabanda di mercancia y material cu ta bin for di teritorio Venezolano.

“Aruba, e super potencia, un isla cu a biba semper di Venezuela y tabata usa contrabanda como su fuente di entrada mas grandi manera ta e caso di benta di koper cu ta bin for di Venezuela, cu e mafia tabata horta y tabata hib’e te hasta e Antia Hulandes ey na unda a bira un di e mayor productor di e metal aki na Latino America.” Diosdado Cabello a enfatisa.

Manera Bon Dia Aruba a publica den su edicion di dia 22 di januari ultimo, maske na december a circula e noticianan for di banda Venezolano indicando cu Aruba ta preparando pa reapertura di frontera aereo cu Venezuela, diadomingo 21 di januari e resolucion NoTAM #A0030/24 a ser actualisa cu tres luna mas te cu 21 di april 2024.

E decision aki a cay di sorpresa na e fuentenan relaciona cu e sector aeronautico Venezolano, na unda nan tabata señala cu tabata “casi sigur” cu lo kita e prohibicion aki na comienso di 2024, despues cu Corsou a dicidi di habri back e trafico aereo na april di aña pasa.

December ultimo prome minister Evelyn Wever-Croes den un conferencia di prensa a bisa cu “Ora cu nos a habri e frontera maritimo cu Venezuela na comienso di e aña 2023, den prome mita di aña, un di e condicionnan tabata cu Venezuela ta bay haci mas na controlnan preventivo na su costa, specialmente estado Falcon, cu ta esun mas cerca y cu mas frecuentemente ta sali boto pa Aruba,” prome minister a indica. “Nos no ta mira mucho di esey ta tuma luga. Pasobra nos ta weita varios boto cu a drenta, y e ora ta mustra cu di nan banda no ta haciendo suficiente. Pues un di e prome cosnan cu nos a haci ta pidi nan pone mas atencion riba e aspectonan preventivo di e control di costa ayanan.”

Pa e banda di Aruba, Wever-Croes a bisa cu ta purbando di aumenta control di costa. “Pa esaki nos tin cu bolbe papia cu Hulanda, pasobra nos tambe tin scarsedad di personal. Nos no tin control di costa posibel 24/7. Den combinacion cu radar, wardacosta y nos propio polis maritimo ta haciendo lo maximo si.”

Considerando cu entrada ilegal ta bira un forma pa drenta Aruba mientras cu e frontera legalmente ta cera, Wever-Croes a sigura cu “Comunicacion cu Venezuela ta bay a traves di ministerio di Relacion Exterior di Hulanda, door cu relacion exterior ta un asunto di Reino,” Wever-Croes a indica. “Y akinan, nos departamento di Relacion Exterior, embahada, consulado, tin contacto cu otro tambe. Kiermen na e nivel ey ta bayendo bon.”

Medionan Venezolano na final di aña 2023 tabata informa cu posiblemente frontera aereo entre Aruba y Venezuela lo mester a habri na comienso di e aña aki, pero e NoTAM aki a ser extendi te cu 21 di april 2024.

Dia 22 di januari, Gobierno di Aruba a informa mediante un comunicado di prensa oficial cu “Aruba ta considerando pa habri e frontera cu Venezuela e aña aki,” den e comunicado aki ta señala cu frontera cu Venezuela ta cera for di aña 2019, na momento cu Gobierno di Venezuela ta esun cu a cera e frontera unilateralmente.

Na mei 2023 a habri e frontera maritimo basa riba palabracionnan haci entre autoridadnan di Aruba y autoridadnan di Venezuela.

E diferente instancianan na Aruba for di e momento ey, a cuminsa prepara pa habri e frontera aereo y ta spera cu den prome kwartaal di 2024 lo por duna un indicacion di ki dia e frontera aereo lo habri.

“E reunionnan ta tumando luga caba, pa por sigura un reapertura sigur y na un forma responsabel. Mientras tanto e ciere di frontera lo ser prolonga cu tres luna mas entrante 23 di januari 2024, pa por finalisa e preparacionnan,” a finalisa.

Mientras tanto, Venezolanonan cu ta biba na Aruba ta den expectativa, wardando un fecha, pa entre otro, nan por bay biaha y wak nan famia ya cu e biahe for di otro paisnan como por ehemplo, Republica Dominicana, Panama of Colombia, ta implica un gasto mas grandi.