Plan di Impuesto 2023 ta trece ahustenan importante tambe pa loke ta trata regulacion di salario minimo pa director di un compania. Directora di Departamento di Impuesto, Luenne Gomez-Pieters, a elabora ariba e informacion aki.
Gomez-Pieters a splica cu e regulacion di salario minimo pa director ta considera cu un director ta ricibi un salario bruto cu ta usual pa e nivel y duracion di su empleo den su compania y e director tin cu paga loonbelasting riba e salario usual.
Si e director tin un compania cu no tin acitvidadnan economico, naturalmente e regulacion di salario minimo pa un director no ta aplicabel.
E regulacion ta valido pa e director di un empresa huridico, NV of un VBA, y no ta conta pa doño di un empresa propio, eenmanszaak. E director mester ta accionista mayoritario, 25% of mas di accionnan, den un compania.
El a sigui splica cu e regulacion di salario minimo pa director ta conta tambe pa companianan nobo. E ley di impuesto ta facilita compania nobo door di stipula e salario di director igual na e salario minimo segun e ley di minimumloon. E salario di director ta valido pa e aña cu ta establece e compania y pa e siguiente 3 añanan.
Pa loke ta trata compania existente cu tin mas cu 4 aña, e salario di e director ta minimo e suma mas halto di e 3 normanan stipula pa ley.
E prome norma ta 75% di salario ekivalente na salario di otro manager di mesun nivel. Di dos norma ta salario di empleado cu ta gana mas den e compania of otro compania liga. Di tres norma ta e salario usual ta 48 mil florin pa aña, cu ta alrededor di cuater mil florin pa luna.
Gomez-Pieters a remarca cu tin excepcion den caso cu e salario ta mas abou cu e salario stipula pa director. Si e salario pa empleonan similar riba mercado laboral ta menos cu 48 mil florin pa aña y e director por prueba esaki, e ora e director por duna su mes un salario mas abou cu 48 mil florin pa aña.
E regulacion di salario minimo di director no ta aplicabel pa companianan cu ta exonera di winstbelasting, compania cu no ta participa riba mercado economico di Aruba y cu ta cay bao articulo 9 te cu 18 di e ley di divisas y dirigente of comisario di un compania estableci na Aruba, cu no ta biba na Aruba.
El a agrega cu tin otro medida tambe cu a wordo introduci den ley cu ta preveni creacion di debe excesivo. Den e caso aki ta cualifica tur prestamo cu ta surpasa un suma di 500 mil florin como dividendo y ta tene cuenta tambe cu un periodo transitorio di dos aña, 2023 y 2024, pa por baha e debenan existente na e nivel stipula.
Tur otro prestamo di un director cu tin su mesun negoshi, NV of VBA, entrante 1 di januari 2023 tin cu cumpli cu e nivelnan di e ley existente cu ta stipula cu e no por ta mas cu 500 mil florin. Si e ta mas cu e suma aki, e diferencia ta wordo categorisa como dividendo.
