DIMP ta coregi informacion: Ta atende entre 600 y 700 hende pa dia

Durante un conferencia di prensa ayera mainta, vocero di Departamento di Impuesto, Meverly Romano-Kelly a duna un actualisacion pa loke ta trata impuesto di vehiculo di motor y tambe e proceso di partimento di e plachinan di number nobo.

Romano-Kelly a recorda na tur ciudadano primeramente cu e deadline pa pago di impuesto di vehiculo di motor, manera tur aña, ta dia 31 di januari. Ya pa varios aña e deadline ta dia 31 di januari y solamente den caso cu dia 31 ta cay den weekend, e siguiente dia di trabou ta bira e ultimo fecha pa por paga e impuesto di vehiculo di motor. Den caso cu un ciudadano tarda sikiera un dia pa haci e pago aki, automaticamente ta aplica un boet di e 50% di e tarifa.

Pa loke ta trata e cumplimento di pagonan di aña 2024, el a splica cu den 2024 a cera aña cu un total di 92,803 vehiculo registra y tabatin na final di aña 86% di e numbernan aki paga, cual ta ekivalente na 79,717 number di vehiculo paga. Esey ta nifica cu tin 14% di persona cu no a cumpli cu nan pago di impuesto di vehiculo di motor. Di e cifra aki 3,613 a paga e mita di aña 2024 y 8,859 number no tin pago mes di e aña 2024 riba nan. Den total e ta suma 12,472 number di aña 2024 cu no tin pago.

El a remarca cu di experiencia nan sa cu no tur aña e cumplimento ta yega 100%, pero mas bien e ta yega den 80% y na final di 2024 el a yega 86%.

Romano-Kelly a enfatisa cu na e 12,472 automobilista cu falta pago, nan no lo por ser permiti pa paga e impuesto di aña 2025 tanten cu nan cumpli cu e pago di aña 2024. El a agrega cu no ta tur persona tin debe di un aña so atrasa, tin mas hende cu tin debe di otro añanan tambe atrasa.

Den casonan cu tin varios aña atrasa den pago, esaki ta acumula hunto cu e boet y acerca tambe ta bin un interes riba e debe aki. E interes ta 6% pa aña y pa por tin posibilidad di paga e impuesto di vehiculo di motor di e aña aki, e automobilista mester paga e debe completo.

Pa loke ta aña 2025, el a indica cu tin 92,835 number registra y di e cantidad aki 24,484 a haci nan pago di aña 2025 caba locual ta representa 26%. Falta ainda pa haci pago 74% cu ta representa un total di 66,214 number cu lo mester ser paga prome cu 31 di januari.

Romano-Kelly a enfatisa cu e periodo aki ta uno hopi druk pa DIMP pa loke ta procesamento di pagonan. Pa e motibo ey el haci un yamado na tur persona cu mester haci nan pago ainda pa haci e pago online via banco. Esaki ta un manera mas facil y rapido pa ambos banda.

Pa loke ta trata plachi di nomber, e aña aki dentro di e proximo dianan ya e personanan cu plachi di nomber por busca nan plachinan. El a indica cu aña pasa esey no tabata posibel ainda, pero e aña aki si DIMP ta cla y e compania cu ta entrega e plachinan aki ta cla tambe pa produci e plachinan.

El a splica cu e personanan cu a haci pago di nan plachi di nomber aña pasa mester pasa busca carta na oficina di DIMP. Cu e carta ey nan ta bay na e compania y despues di tres dia di trabou por busca e plachi di nomber na oficina di DIMP back. Pa esaki no mester cita ya cu e ta un proceso cu ta core separa di e plachinan normal.

Pa loke ta trata partimento di plachinan nobo, Romano-Kelly a indica cu DIMP a anuncia aña pasa cu esaki ta bay sucede via cita. El a splica cu actualmente nan ta manehando tres kalender grandi, tres agenda; un agenda pa pensionado, un agenda pa personanan priva y un agenda pa compania.

El a indica cu companianan cu no ta eenmanszaak ta atende cu nan riba diasabra y cada compania por busca pa cada cita maximo 25 plachi. Tin companianan cu tin hopi auto, tin cu hasta tin mil auto, e companianan aki mester haci mas cu un cita.

Durante siman ta yuda e publico general. Den e prome ora, di 8or pa 9or di mainta, ta yuda e pensionadonan cu nan afspraak y despues di e prome ora ta yuda e resto di e contribuyente, personanan priva.

El a indica cu pensionadonan tambe mester traha cita pa motibo cu tin un cantidad hopi grandi di pensionado y no por laga mil of dos mil pensionado yega na e oficina, pasobra e personanan aki no por warda asina largo. P’esey tambe a dicidi di structura e sistema na e manera mas facil tanto pa e cliente como e trahadonan di impuesto.

Pa por traha cita e pensionadonan no mester subi documento den e sistema manera ta pidi na e resto di e publico. Pensionadonan ta simplemente duna nan nomber, number di telefon, cual plachi nan ta busca y asina ta registra e cita pa nan. Pensionadonan cu ta desea ayudo pa traha nan cita por pasa na oficina di DIMP pa asistencia.

Despues cu caba di yuda e pensionadonan so durante e prome ora, DIMP ta sigui na atende e comunidad en general.

Romano-Kelly a indica cu personanan priva por busca maximo cinco plachi pa persona.

DIMP ta atende 600 pa 700 persona pa dia

El a señala cu den un entrevista recien el a ricibi e pregunta tocante cuanto cita tin pa dia, na cual el a contesta 50 pa dia. Romano-Kelly a clarifica y coregi indicando cu no ta trata di 50 cita pa dia, pero 52 timeslot pa dia. El a splica cu cada timeslot ta 10 minuut y cada timeslot tin un maximo cantidad di persona cu ta ser atendi. Esaki ta nifica cu no ta haya nunca un hende cu cita di 8or y un hende so cu cita di 8:10, mas cu un hende por registra pa e mesun timeslot y den total DIMP ta atende entre 600 y 700 persona pa dia.

El a indica cu nan a cuminsa entrega plachi di number nobo net un siman prome cu Pasco y teniendo na cuenta cu e tempo necesario pa cera conoci cu e proceso y e dianan di fiesta di Pasco y fin di aña, ta apenas e siman aki, desde 6 di januari, DIMP a cuminsa traha simannan completo y cu un agenda completamente yen. El a agrega cu mientras tempo ta pasa ta keda ahusta e cantidad di persona cu por atende pa dia.

El splica cu nan ta calcula cu lo tuma mas o menos seis luna pa termina di entrega e plachinan nobo na tur e personanan cu haci pago di impuesto di vehiculo motor di aña 2025, cu segun nan calculacion ta alrededor di 80% di e total di numbernan registra.

Pa loke ta trata e controlnan di polis, el a splica cu DIMP ta den contacto cu Cuerpo Policial di Aruba (KPA) y el a indica cu KPA no ta duna boet ainda pa no tin un plachi di number nobo. El a clarifica cu esaki no ta nifica cu polis no ta controla, polis por controla na cualkier momento, esey ta parti di nan trabou, pero a enfatisa cu polis ta controla si e auto ta cumpli cu su pago di impuesto di vehiculo di motor.

Te ora cu DIMP no entrega e plachinan di nobo di tur automobilista cu a cumpli cu nan pago di impuesto pa aña 2025, DIMP no ta duna green light na KPA pa cuminsa controla riba e plachi di number mes.

El a ratifica cu no ta pasobra polis no ta duna boet pa plachi di number kiermen cu no ta duna boet pa pago di impuesto. El a specifica cu tur contribuyente mester cumpli cu nan pago di impuesto di vehiculo di motor prome cu 31 di januari y entrega di plachi di number nobo ta apart.