E demanda pa number di auto ta hopi halto na departamento di Impuesto. Esaki ta bira mas pisa cu otro lunanan, vooral despues cu ta culmina un campaña entre diferente banco y companianan di benta di auto. Pero tambe departamento di impuesto a confronta problema cu nan sistema automatisa cu a haci cu nan no por duna temporalmente number di auto.

Vocero di departamento di Impuesto, Mervelyn Romano a declara na Bon Dia Aruba cu e situacion cu nan sistema automatisa poco poco ta normalisando. Aunke e ta reconoce cu tin biaha cosnan ta sosode inespera. Actualmente nan ta trahado cu dos sistema pareu, e bieu y e nobo, y esaki ta crea un situacion fastioso. Ya cu e conexion entre e dos sistemanan ey no tur ora ta cana pareu manera nan ta desea.

Igualmente el a bisa cu pa dia ta wordo registra basta cliente nobo cu a cumpra nan prome auto of otro auto, y nan ta bin registra e auto pa por haya un number. E echo cu nan ta pasando den un serie di reto, no kiermen cu esun cu a cumpra un auto nobo no por core cun’e, debi na e situacion aki. Normalmente e mesun dia e registracion di e auto por tuma luga si e cliente tin e papelnan cu ta duna specificacion di e auto. E cliente ta haya e carta di registracion cu tur e detayenan di e auto pa bay seguro. Unabes cu e ta cla cu su seguro di auto e por bin bek departamento di impuesto pa paga e belasting.

Ora ta trata di registracion nobo nan no por duna e cliente e plachi riba e mesun dia ey. Solamente nan por haci’e si nan tin un number cla disponibel cu nan por dun’e mesora. Pero hopi biaha e cliente ta haya un carta di permiso pa e persona mes traha un plachi pa e por core su auto, sin cu e ta haya problema cu polis. E carta ta pa 30 dia, pero mirando e problemanan cu a surgi, e cliente ta bin cu e carta y nan ta haya 30 dia mas di permiso, te ora e  plachi ta bin cla. Esaki ta algo temporal, ya cu ta deber di e departamento aki di dun’e un set nobo di  plachinan.

Maneho cauteloso

El a splica cu  nan ta hibando un maneho cu nan no ta pidi un gran cantidad di plachi pa aña. Den e ultimo 3 aña tin un cantidad cu ta uzando e mesun number di añanan anterior. Pero pa e cliente nobo so nan ta bestel plachi number. Nan no ta bestel den cantidad exagera, pasobra cada plachi ta costa gobierno hopi placa. P’esey nan ta bay segun e desaroyo di e demanda ta bay.

Tambe nan tin basta cliente cu ta bay entrega nan plachi di number temporal of definitivamente. Nan ta bisa departamento di impuesto cu nan no ta uzando e auto, pero nan tin pensa di sigui uza e number. Sra. Romano a bisa cu pa e cliente ey nan ta warda e plachi di number. E otro clientenan cu ta bin entrega nan plachi di number definitivamente, nan ta registra nan pa tin un inventarisacion. Departamento di Impuesto ta duna prioridad na e numbernan ey pa otro cliente cu a bin pidi pa un number nobo. Ta solamente si no tin number entrega,  e departamento ta haci uzo di numbernan nobo.

Kehonan

Recientemente tabatin keho di clientenan cu a bay busca number nobo di auto y na e momentonan ey departamento di impuesto no tabatin disponibel. Sra. Romano a laga sa cu desde 3 di april, nan a bay over den un sistema automatisa nobo cu a trece su retonan cun’e. Nan tabatin contratiempo pa e traspaso di e doño bieu pa e doño nobo. Si e proceso ey no ta bay bon e belasting ta bay sigui core riba nomber di e cliente bieu.

Esaki a causa un atraso den e procesamento di e numbernan, ya cu nan no por duna e number ey na un otro cliente. Nan mester bisa e cliente cu aworaki nan no por registra su auto riba un number, pero denter di poco esey si ta posibel. E situacion aki a crea e impresion cu nan no ta dunando number mas of cu nan no tin number.

El a splica cu tur e clientenan pa wordo registra si nan no tin e number den disponibel, nan ta laga un compania traha e plachi. Pero cu nan a haya algun contratiempo pasobra e compania aki su material pa traha e plachinan a caba.  P’esey tampoco nan por entrega e plachinan.

Normalmente e proceso aki por tarda entre 5 pa 10 dia trabou. Pero durante e ultimo 2 luna hopi cliente a warda mas cu 1 luna prome cu nan por haya nan plachi. Tambe esaki a causa un retraso den entregamento di plachinan nobo. Departamento di impuesto a pone riba nan facebook page nan clientenan cu ta wardando nan plachi, ya sea pa registracion nobo of esunnan cu nan plachi a perde color, pa bin busca nan den e siman aki.

E situacion aki a ocasiona un retraso ya cu departamento di impuesto no kier a bestel numbernan nobo, siendo cu nan tin un cantidad cu a wordo entrega cu nan por duna na nan clientenan sin mester di haci gasto extra. Esaki tabata un di e motibonan cu nan tabata bisa cu nan no por duna un number. Na e momento aki e no por bisa si e cantidad di number entrega ta core pareu cu e cantidad di demanda pa number nobo. Ya  cu nan tin henter un proceso pa inventarisa nan.

Ademas den caso cu nan reserva di plachi ta caba, nan tin cu haya autorisacion di management pa bestel un cantidad di 1 mil of 2 mil number mas.  “Esaki ta e maneho cu nos tin. E ta un maneho hopi cauteloso”, e di. No ta un maneho cu nan ta bestel cantidad di  plachi, siendo cu tur dia tin cantidad di hende cu ta bay entrega nan plachi di number definitivamente.

Sra. Romano a bisa cu departamento di impuesto ta keda cu ‘e pensamento cu nan kier yuda e cliente mas hopi y lihe posibel’. “Pero lamentablemente tin ora por logra y ora cu no por logra.”