No a tuma ningun decision riba cuanto e VAT of BTW lo mester ta y cualkier mencion di percentage awor ta prematuro y no ta yuda e proceso. Asina Director di Departamento di Impuesto, DIMP, mr. Louenne Pietersz a bisa Bon Dia Aruba, como reaccion riba e circulario cu Grant Thornton a publica e siman aki.
Manera ta conoci, e circulario cu tabata un resumen, segun e compania, di cambionan den impuesto na caminda a keda publica riba media social. Den e circulario, cu Bon Dia Aruba a publica tambe ta papia di un BTW di 18 porciento. Tambe a papia di un tarifa mucho mas abou di 6 porciento pa cuminda y bebida no-alcoholico.
Sinembargo, nada ta concretisa ainda. “Ta DIMP of Gobierno di Aruba lo anuncia cifranan, personahenan y impuestonan oficial,” mr. Pietersz a enfatisa, agregando cu ainda ta den fase di colaboracion y intercambio di idea. “Speculacion y interpretacion prematuro di reforma fiscal ta inflamatorio y no ta contribui na certidumbre di un proceso serio y importante pa nos pais.”
Segun e Director di DIMP a reuni cu tur oficina di accountants y specialistanan di impuesto, for di Deloitte, BDO, CATC y Ernst & Young entre otro, y Grant Thornton tabata e unico cu a saca informacion sin cu e concepto ta completamente cla.
Ainda tin mas ronda di intercambio di pensamento na caminda prome cu por presenta e structura nobo.
