Ayera mainta director di Departamento di Impuesto (DIMP) Luenne Gomez-Pieters, a tene un conferencia di prensa pa informa comunidad tocante e formulario di winstbelasting cu lo bira digital y lo tin impacto ariba eficiencia di departamento, ademas lo facilita na contribuyentenan pa nan por cumpli cu nan deber di impuesto.

Formulario di Winstbelasting ta bay bira digital unda Gomez-Pieters a sigura cu contribuyentenan cu ta paga e impuesto aki ta custuma di haya nan formulario den e forma di papel, pero nan ta bin haciendo cambionan pa loke ta trata digitalisacion for di un par di aña caba, esaki a bay den forma di fase caminda cu nan a cuminsa cu tur formulario cu contribuyente mester entrega mensualmente.

“Awor ta e turno di e formulario di winstbelasting, e ta un proyecto di un envergadura basta grandi, nos tin nos ekiponan profesional trahando duro y for di aña pasa despues cu nos a caba cu introduccion di BBO na frontera, nos a cuminsa di biaha cu e preparacion di e proyecto aki y aworaki nos ta anuncia cu 16 di mei e formulario di winstbelasting lo ta disponibel den nos portal www.impuesto.aw” el a sigura.

Ademas, el a informa cu si contribuyentenan ta haci uso di un asesor fiscal, e contribuyentenan mester keda den contacto cu nan pa e proceso aki por cana mas lihe y cu pa aña nan ta otorga casi 10.000 formulario, manera Gomez Pieters a sigura.

E formulario aki ta bay ta digital y algun asesor fiscal cu ta usa diferente programa di formulario pa winstbelasting ta bay keda den pasado mirando cu e formulario mester wordo entrega via nan sistema digital y ta bay ta accesibel for di 16 di mei. E fecha final pa entrega e formulario di e impuesto aki ta 1 di juli 2024. Den caso cu un contribuyente lo kier haya un extension pa entrega e formulario e mester presenta un voorlopige aangifte y haci e pago corespondiente, despues di duna e prolongacion e fecha final ta bira 2 di december 2024.

Asina mes, el a señala cu tur contribuyente mester tin un cuenta activo den e plataforma Bo Impuesto portaal (BOi) pa asina por drenta y descarga e formulario cu nan ta bay entrega. Esnan cu no tin un cuenta, mester cuminsa haci e tramitenan pa por haya un cuenta y evita cu despues lo por haya cobransa adicional.

Igualmente, Gomez-Pieters a declara cu nan ta hayando preguntanan tocante asesor fiscal, e contribuyente mester asigna su asesor den e portal ya cu esey no ta bay di manera automatico, “a bo mester drenta den portaal y bo tin cu asigna ken ta e consehero cu ta bay atende cu bo formulario di winstbelasting,” el a bisa.

Un otro punto cu el a trece dilanti ta tocante actividadnan economico caminda algun contribuyentenan ta indica cu nan no tin esey, por ehemplo, nan a lanta un compania N.V cu ta registra na Camara di Comercio pero no ta activo of no tin actividad economico, pa esaki el a comenta cu si tin un compania cu ta registra na Camara di Comercio e no ta kita for di nan registro, e ta un compania cu tin e obligacion pa entrega e declaracion di winstbelasting tur aña, pa motibo cu inspector por controla na ki momento si ta bay tin actividad.

E compania cu ta desea cu un otro persona of nan consehero fiscal regla e cuenta di e portaal BOi pa nan, lo mester duna e persona un carta di apoderacion pa asina ey por cuminsa cu e tramite y haya un cuenta.

Di loke ta trata unidadnan fiscal yama ‘Fiscale eenheid’ cu e digitalisacion di e declaracion aki e compania subsidiario, no ta bay ricibi e declaracion riba e portaal BOi, solamente e companianan ‘holding of moedermaatschappij’ ta esun cu tin e obligacion pa entrega e declaracion di winstbelasting.

Tur contribuyente cu tin un cuenta riba e portaal BOi por consulta nan datonan, por ehemplo, ora ta drenta den e portaal ta scoge e folder “Gegevens belastingplichtige”. Den e folder por haya e datonan di adres, number di cuenta di banco, unidad fiscal y pa cua tiponan di impuesto e compania ta registra.

“Contribuyente ta esun cu ta den control den tur su asuntonan di belasting, esey kiermen cu ta e contribuyente so esun cu ta mira e informacion ey, como consehero fiscal mi no por drenta den e portaal BOi y busca informacion di mi cliente, pasobra mi mester di un autorisacion pa mi por haya e informacion ey,” el a sigura.

Entrante 2023 su boekjaar, tur contribuyente ta obliga a base di ley pa entrega e formulario di winstbelasting den forma digital, peticion pa papel of declaracion riba papel lo no ta posibel mas.

Gomez-Pieters tambe a sigura cu nan ta den contacto cu cierto stakeholders, nan a tene algun sesion interno unda nan a invita e conseheronan fiscal pa wak e sistema di e departamento aki pa duna un feedback y nan haya sa kico ta loke nan por ahusta pa facilita nan haci nan trabou y ademas, nan lo tin planea varios sesion pa prome cu e fecha lo yega y lo ta disponibel den e sistema nan consehero fiscal lo haya training cu e informacion necesario.

E parti mas importante di nan trabou di digitalisacion ta e compliance y eficiencia, segun loke Gomez-Pieters ta sigura, “nos ta mira cu ora cu nos ta otorga formularionan den forma di papel, nos ta haya hopi peticion pa duplicado, tur cos ta costa cen y na momento cu nos ta saca e declaracionnan nos ta haya un lista di peticion, pa eficiencia esey ta un di e drivers y ademas e compliance, ora loongbelasting a cuminsa 9 aña pasa, e compliance di loongbelasting BBO ora nos tabatin e reforma di papel tabata na 60% esey kiermen cu tur contribuyente tabata haya nan formulario y 60% tabata drenta back, aworaki nos ta na casi 83% pushando 85% di compliance y bo ta wak cu digitalisacion ta facilita e contribuyente pa por cumpli y no bin akinan y para den rij, e no mester tene na cuenta e tempo cu e ta gasta pa entrega su formulario y esaki ta un formulario cu mayoria comerciante ta usa, y nos lo sigui cu otro belasting tambe pa digitalisa tur e formularionan,” el a finalisa.