Ayera mainta durante un conferencia di prensa Departamento di Impuesto (DIMP), Luenne Gomez-Pieters, directora di Departamento di Impuesto, a brinda informacion importante prome cu e cambio di aña tocante e Plan di Impuesto 2023 mirando cu nan ta ricibiendo diferente pregunta y tambe tin incertidumbre cu ta existi pa cu e plan di impuesto pa aña 2023.

Gomez-Pieters a indica cu e Plan di Impuesto 2023 ta un plan hopi extensivo y tin cambionan di e ley di impuesto cu tambe ta hopi tecnico.

El a remarca cu e obhetivo principal di e Plan di Impuesto 2023 ta e recuperacion di Aruba su finanzas publico pa medio di compensacion, reparticion husto den e peso di impuesto y naturalmente mehoracion di cumplimento di tur ciudadano y bishitante.

Den cuadro di implementacion di e ley di Plan di Impuesto 2023, ta drenta na vigor entrante 1 di januari 2023 varios cambio den e leynan di impuesto y Departamento di Impuesto kier mantene tur contribuyente informa di e cambionan mas importante pa asina nan por tin e preparacion necesario. E ley di Plan di Impuesto 2023 a keda aproba oficialmente door di Parlamento riba diaranson 14 di december 2023 y a keda publica bao: “Afkondigingsblad van Aruba 2022 no. 161”

Un di e prome cambionan cu Gomez-Pieters a splica cu ta hopi importante pa menciona ta cu ta bay introduci un tarifa nobo di BBO. E tarifa actual di BBO ta 1.5%, BAVP ta 1.5% y BAZV ta 3% cu ta duna un tarifa combina di 6%.

E tarifa actual di BBO ta wordo ahusta na 2.5%, esey kiermen cu tin un aumento di 1%. Ta introduci e cambio aki entrante 1 di januari 2023 y lo resulta den den un tarifa combina di 7% di BBO, BAVP y BAZV.

Ta introduci tambe conhuntamnete cu e cambio aki un pakete di compensacion pa mitiga e efectonan di inflacion door di e introduccion di e ahuste den e tarifa di BBO. Naturalmente no por acapara tur efectonan di inflacion mirando cu Aruba tin di haber cu inflacion di importacion y tur efectonan mira mundialmente cu ta crea un aumento di prijsnan den producto y/of servicio.

Pa e areglo di comerciante chikito tin un cambio ta bay ser intorudi den e Plan di Impuesto 2023. Ta reduci e limite di entrada di 84 mil florin pa aña pa 50 mil florin pa aña y e ley di impuesto ta absolve e comerciante chikito di e obligacion di entrega e declaracion y paga BBO, BAVP y BAZV.

E simplificacion di ley aki ta reduci tambe e carga administrativo cerca e comerciante. E ta absolve e comerciante chikito di entrega e formularionan tambe den un forma anual y e comerciante chikito lo tin e obligacion di declara y paga BBO/BAVP y BAZV solamente na momento cu e surpasa e limite di entrada di 50 mil florin pa aña.

Gomez-Pieters a sigura cu e simplificacion di e ley aki no ta afecta un grupo grandi di comerciantenan mirando cu e grupo cu tin un entrada entre 50 mil y 84 mil florin pa aña ta 24 comerciante nada mas.

Otro cambio importante cu e directora di DIMP ta señala ta cu den e ley di BBO/BAVP y BAZV a amplia e definicion di “servicionan” cu servicionan electronico y servicionan di telecomunicacion, radio y television pa motibonan di compliance. Den pasado no tabata paga of cobra BBO ariba servicionan cu ta wordo importa y servicionan cu ta wordo brinda aki na Aruba.

Na mesun momento ta amplia e reglanan pa cu e sitio unda ta duna servicio pa asina por determina cual compania tin e obligacion di paga BBO/BAVP y BAZV ora ta trata di transaccionnan entre companianan estableci na Aruba y companianan estableci den exterior.

“E definicion nobo di e servicionan cu ta cay bao BBO/BAVP y BAZV awor tambe lo encera e servicionan electronico y servicionan di telecomunicacion radio y television. Servicionan electronico ta por ehempel servicionan online di accounting, stockphoto/video/audio, website builder, skirbimento di documento, acceso na plataforma di data, download of mira pelicula online, download of scucha musica online,” Gomez-Pieters a splica.

Bao servicio electronico no ta cay intercambio di informacion – conseho- via e-mail of mercancia – paña of sapato – cu ta wordo cumpra online.

Den e ley di BBO/BAVP y BAZV a introduci tambe un regulacion nobo unda a amplia e definicion di e sitio unda un compania ta duna servicio. Normalmente un compania cu ta estableci na Aruba ta paga impuesto na Aruba riba su servicionan cu e ta brinda na Aruba.

Actualmente, segun Gomez-Pieters a indica, ta asina cu si e compania no ta estableci na Aruba y ta bende su servicionan na un compania di Aruba, e compania stranhero no ta paga impuesto na Aruba, pasobra e no ta estableci na Aruba. Cu e regulacion nobo tin un cambio di sitio unda ta duna servicio y ta considera cu e sitio unda e servicio ta wordo duna e caminda cu mester cobra e impuesto concerni.

Esaki ta nifica cu ta cobra BBO/BAVP y BAZV na e compania di Aruba cu a cumpra e servicio for di e compania di exterior. E regulacion nobo ta valido pa por ehempel servicionan electronico y servicionan di telecomunicacion, television y radio.

“E situacion di cambio di sitio di servicio ta importante pa por determina cual compania tin cu paga BBO/BAVP y BAZV y sistema aki ta uno conoci den e mundo di impuesto y ta wordo aplica tambe na Hulanda y ta conoci como verleggingsregeling,” el a agrega.

El a remarca cu e cambio aki ta aplicabel solamente ora ta trata di negoshi entre comerciantenan, pues ‘Business to Business’ (B2B) y no ‘Business to Consumer’ (B2C). El a enfatiza cu si un persona priva cumpra servicio di un compania den exterior, e persona priva no ta paga BBO/BAVP y BAZV.

El a sigui splica cu e compania stranhero por nombra un representante fiscal na Aruba ora ta trata transaccionnan di “Business to Consumer” pa asina e representante aki por actua na nomber di e compania stranhero y consecuentemente e representante fiscal ta haci declaracion y paga BBO/BAVP y BAZV na Aruba pa e compania stranhero.

Gomez-Pieters a subraya cu e regulacionnan nobo ta garantisa cu gobierno ta haya su parti husto (fair share) ora ta trata entrada di impuesto y pa Departamento di Impuesto tambe e reglanan nobo ta sirbi pa mehora e compliance di parti di e contribuyentenan cu ta den liña di practicanan comun den e mundo di impuesto.