Diamars ultimo, diferente medio di comunicacion a trece dilanti dos caso di personanan di nacionalidad Venezolano cu pa via di e pandemia a keda na Aruba y cu nan no tin suficiente recurso pa bay bek na Venezuela den e vuelo di ‘Regreso Boluntario’.

Tocante esaki, Departamento di Integracion, Maneho y Admision di Stranhero (DIMAS) a ofrece un conferencia di prensa ayera mainta pa aclaria cierto puntonan di e tema aki, Marilyn Wout P.R di e departamento a splica cu Regreso Boluntario ta un programa di asistencia cu ta brinda ayudo na stranheronan cu ta na Aruba cu tin un status legal, tambe pa esunnan cu tin un status iregular of turistanan cu a keda pega na Aruba pa via di e pandemia y cu ta interesa di bay bek na su pais di origen.

Wout a bisa cu e ayudo humanitario cu nan ta brindando ta consisti di duna informacion, tuma e registracion di cuanto persona ta interesa di bay y pa cua pais nan ta bay, hunto cu e palabracionnan diplomatico cu e proceso aki mester, ademas di ayudo logistico pa regla e vuelonan y asina e personanan por regresa na nan pais bek.

El a remarca cu e vuelo aki no ta un vuelo cu ta wordo ofreci a base gratuito pa motibo cu nan no ta cobra e esfuerso y energia cu ta hinca den e proceso pero si tin cu paga e gasto di e ticket “nos mester corda cu durante e pandemia aki tin hopi frontera cu ta cera y p’esey esaki ta vuelo humanitario”, Wout a afirma.

Ademas, el a bisa precies cu mester haci deliberacionnan na nivel diplomatico cu e pais di origen y e ora ey nan ta regel e vuelonan y personanan ta cubri su asiento den e vuelo, e prijs di e ticket ta dividi den e cantidad di persona cu ta biaha, ademas den e ticket aki e ta paga e test di Covid y impuesto di salida di aeropuerto, segun loke Wout a menciona.

Desde april cu nan a lansa e programa di Regreso Boluntario nan a haya un cantidad grandi di personanan cu a registra pa e asistencia aki cu vuelonan cu a bay Europa, Argentina, Colombia, Guyana, entre otro paisnan na unda e fronteranan na e momentonan aki ta cera.

Pa loke ta trata e caso di vuelonan pa Venezuela, el a trece dilanti cu esaki a bay door danki na embahada na Venezuela, Consulado na Aruba y diferente instancia cu a aporta pa e vuelonan aki por wordo realisa, aworaki nan ta bezig cu e di tres vuelo cu tentativamente lo por tuma luga na final di october pero ainda e palabracionnan ta andando.

Asina mes, Wout a señala cu tin mas di 600 persona cu a registra den vuelo aki pa bay Venezuela pero esaki mester di esfuerso pa motibo cu ta un cantidad hopi grandi cu no por bay den un vuelo so,tambe mester tuma na cuenta cu den vuelo aki tin personanan cu lo wordo deporta.

Personanan cu ta interesa pa aborda e vuelo di regreso boluntario mester drenta den website di DIMAS www.dimasaruba.aw e persona ta click riba e parti cu ta indica regreso boluntario, mester yena e formulario completamente pa motibo cu Wout a sigura cu tur e dato cu ta wordo pidi den formulario ta hopi necesario pa autoridadnan di e pais di origen.

Tin casonan cu e persona ta registra caba pero na momento di yama of tuma contacto cun’e e no por wordo confirma, pa loke Wout a bisa cu nan tin cu sigui cu e siguiente persona den e lista, tambe a trece dilanti cu si e persona no ta haci e test di Covid of no por paga e ticket e lo no por aborda e vuelo.

El a declara cu tambe ta existi cierto escenario cu ta cambia e circunstancia di e pais di origen como por ehemplo, den situacion di vuelo pa Venezuela nan tin un bon entendimento cu gobernador di estado Falcon, el a indica cu nan lo por procesa 140 persona pa cada vuelo for di Aruba, loke ta nifica tambe cu e personanan cu ta bay den vuelo cu ta yega na Punto Fijo nan ta regel nan transporte pa nan por yega na nan cas of na nan ciudad.

Pa loke ta trata personanan cu a yega como turista na Aruba cu a keda pega pa motibo di ceramento di frontera, Wout a manifesta cu nan ta purbando di yuda e personanan aki, pa esunnan cu a yega cu un invitacion, el a señala cu nan mester ta consciente cu e persona cu a manda pa nan e carta di invitacion ta e garante di dje y si algo ta pasa como por ehemplo, e yegada di Covid cu ni un hende tabata prepara pe, e gastonan di e persona invita ta cay bou di e garante.

“Pais Aruba no por cubri pa e gastonan aki pasobra ta imposibel”, Wout a finalisa.