DIMAS ta introduci proyecto piloto di portal digital pa peticion di permiso

Durante un conferencia di prensa ayera mainta, vocero di Departamento di Integracion, Maneho y Admision di Stranhero (DIMAS), Marilyn Wout a elabora ariba e proyecto piloto di portal virtual cu DIMAS ta introduciendo pa facilita e proceso di peticionnan di permiso.

Wout a splica cu desde aña pasa nan a lansa esaki pa organisacionnan den gobierno manera Marina Real, SKOA, directivanan di scol, hospital, entre otro, y e organisacionnan aki a duna nan feedback pa asina mehora e portal. Na e momentonan aki, Wout a indica, nan ta asina leu cu nan a cuminsa haci e proyecto piloto aki tambe cu organisacionnan manera AHATA.

Siman pasa y e siman aki, AHATA a caba di drenta e portal y e miembronan a mustra interes pa haya e training con pa traha cu e portal nobo di DIMAS. A traves di e portal nan por entrega peticionnan di permiso tanto pa e empleadonan como pa e famia di e empleadonan tambe.

Wout a sigui splica cu riba e portal nan por haci peticion di permiso pa mas aña. E clientenan por haci peticion di un te cu cinco aña. Pero el a enfatisa cu pa permisonan cu tin componente laboral, e persona mester haya un conseho positivo di mas cu un aña for di Departamento di Progreso Laboral (DPL) pa asina DIMAS sigui cu e proceso di e peticion di e permiso.

“E siman aki nos a drenta exitosamente e miembronan di AHATA y nos kier duna AHATA un danki cu nan a colabora cu nos y cu nan miembronan ta dispuesto pa duna nos feedback. Nos a haya feedback hopi valioso di nan caba cu nos lo incorpora den e mehoracion di e portal”, Wout a bisa.

Aki dos siman DIMAS lo continua cu e miembronan di Aruba Trade & Industry Association (ATIA), despues lo sigui cu Aruba Food & Beverage Association (AFBA) unda nan miembronan tambe lo ricibi e training pa traha cu e portal virtual.

Wout a agrega cu a traves di e portalnan lo por haci un siguimento di e proceso, con leu e peticion ta canando y nan lo por haya tambe e diferente documentonan cu ta di importancia pa e cliente.

Un punto importante cu Wout a menciona ta pa e clientenan, persona individual, cu sa cu nan permiso ta caducando pronto, pa pidi e dunado di trabao, e empresa, si nan ta interesa pa participa cu e proyecto piloto di e portal pa asina pa medio di e departamento di HR of departamento concerni por haci entrega di e peticion a traves di e portal.

Wout a indica cu aworaki nan ta bezig ta verifica e traduccionnan ariba e portal tambe pa asina na momento cu DIMAS lansa e portal pa henter pueblo di Aruba, nan por haci nan peticion den Hulandes, Ingles of Spaño.

El a remarca cu e portal virtual aki ta haci e caminda hopi mas lihe tanto pa DIMAS como pa e clientenan tambe, pasobra prome cu Covid e clientenan tabata yega DIMAS cu full e stapel di papel y e trahado di front office mester a introduci tur e informacion di tur e formularionan den e sistema, pa asina e peticion por cuminsa cana e caminda corecto.

Durante Covid DIMAS a introduci e e-Form, cual ainda nan ta usando y esaki ta un stap prome cu e admision. Wout a splica cu aworaki bayendo na e portal nan ta salta dos stap eigenlijk, cu ta e e-Form y e parti di admision, kiermen e proceso ta bira mas lihe pa e cliente, e cliente ta gana tempo, y di e forma aki ta pone e responsabilidad tambe den man di e cliente, of e HR di e compania, pasobra nan ta esnan cu ta bay introduci e informacion.

Wout a subraya cu e introduccion di e portal nan ta spera cu ta bay tin menos fout na momento di skirbi un nomber, fecha di nacemento, of ora di skirbi e nacionalidad di e cliente. Foutnan ta bay wordo reduci y e responsabilidad e ora ta bay na otro banda di e mesa, dus na e cliente of na e compania.

Desde aña pasa DIMAS a automatisa algun proceso. Por ehempel na momento cu e peticion pa permiso wordo firma y cu e cliente a haya e advies positivo of negativo, e ora e sistema ta mande automaticamente pa e cliente via e-mail. Wout a remarca cu esaki ta trata solamente den caso di renobacionnan di permiso. Locual ta e prome peticion si ta cana e stapnan normal.

Pero cu e portal e stapnan aki di renobacion tambe ta cay afo y, segun Wout ta indica, ta corta sigur un tres siman di tempo di proceso.

Na e momentonan aki cu DIMAS ta bezig cu e proyecto piloto solamente pa un grupo selecto di companianan of instancianan di gobierno of semi-publico. Despues cu nan termina e grupo aki nan ta bay tin e proyecto piloto aki tambe pa companianan cu ta desea di haya e training aki bao peticion of demanda.

Personanan individual lo haya e oportunidad pa traha cu e portal na momento cu DIMAS caba cu e companianan aki cu ta na luna di september. Despues di september nan lo cuminsa duna e training na e personanan individual pa asina nan tambe por siña con pa traha den e portal.

Wout a tuma e oportunidad pa recorda tur clientenan cu na momento cu entrega un peticion, por favor sigura cu tur e documentonan tey. Segun el a indica, na e momentonan aki alrededor di 60% di peticionnan ta wordo entrega incompleto, sea cu nan falta DPL of algun otro documento y esey tambe ta tuma tempo y ta atrasa e proceso di e peticion.

Pa loke ta casonan cu e cliente ta sigur cu a entrega tur cos y haci e pago necesario, Wout a splica cu si e sliente ripara cu mas di seis siman pasa, mester entrega un keho oficial via e E-helpdesk ariba e website di DIMAS. El a sigui splica cu tin peticionnan na unda por ehempel e persona ta haci su pago, pero e pago no ta wordo procesa door di Departamento di Impuesto. Esaki por pasa pa diferente motibo. El a enfatisa cu e persona cu wak cu cinco of seis siman a pasa y no a ricibi un contesta, manda e comprobante di pago pasobra por ta e caso cu e pago no a wordo registra den e sistema di DIMAS.