DIMAS: Señora su yiu no por firma p’e conforme maneho

Departamento di Integracion, Maneho y Admision di Stranheronan (DIMAS) a brinda nan banda di e storia cu a aparece riba portal 24ora.com di un señora expresando su frustracion pa por haya status legal na Aruba, mirando cu su yiunan tur si tin estadia regular. E persona lo kier a haya un tipo di permiso ‘special’, pero e departamento a splica cu den cierto caso no ta posibel, mientras si tin otro opcion disponibel.

Diahuebs mainta a sali riba medionan di comunicacion un noticia caminda un hende muhe tabata duna su punto di bista di situacion cu e ta confronta cune na departamento di DIMAS.

DIMAS a comparti detaye di esaki caminda ta informa cu un persona stranhero cu permiso kende tin mas di 3 estadia legal por aplica pa su casa bou capa di permiso ‘gezinshereninging’. E permiso aki na principio no ta duna posibilidad pa traha.

Si en caso cu e persona cu ta bou di e firma di su casa kier subi riba mercado laboral e mester pasa un evaluacion di mercado laboral caminda e persona local (sea persona cu paspoort Hulandes of firma liber) tin preferencia pa e cupo di trabou cu e persona no-local kier ocupa.

Si den e evaluacion pa e cupo di trabou tin local disponibel, e local ta esun cu ta haya e cupo aki y pa e motibo aki Departamento di Progreso Laboral (DPL) ta duna un conseho negativo pa subi mercado laboral den e funcion pa cual el a aplica pe.

Den caso manera esun cu a sali riba e portal menciona, ta bisa cu cada persona ta haya atencion na DIMAS mes y cu den e caso specifico aki a atende cu e persona diferente biaha.

DIMAS a indica cu tin mas opcion disponibe, pero lo mester pasa un screening of evaluacion na DPL prome.

Mirando e echo cu e señora lo tabata kier pa su yiu firma pe, DIMAS ta comparti e siguiente informacion: e ta bisa cu e mucha en berdad ta reconoci pa un tata Arubiano y tin paspoort Hulandes, pa motibo di esaki e mama ta desea un permiso di ‘bijzondere band Aruba’.

Den e caso aki e persona no ta bin riba aanmerking pasobra e mucha no ta naci na Aruba pero den exterior. E ta un persona cu a keda reconoci na grandi y a haya e naturalisacion pa su tata despues.

Pa e motibo aki e mama no ta cay boy remarke pa un permiso manera e at pidi. E otro ta cu den persona ta casa cu otro pareha cu ta riba permiso y nacionalidad di exterior tambe cu actual tin 8 permiso, dus persona tampoco no por firma pa motibo cu no tin firma liber of passport hulandes.

E persona ta cay bou di gezinsvorming, cual ta un categoria di permiso pa un pareha casa cu ambos nacionalidad stranhero. Aunke na prome instante esaki no ta bin cu permiso di trabou, si ta desea por cana e caminda na DPL pa asina por haya un conseho positivo pa traha cerca un dunado di trabou.

Departamento di DIMAS a brinda asistencia na e persona. Nan a tuma e documentonan y a duna e informacion di tur posibilidad cu e persona por tin, pero ‘nunca a keda sin duna contesta riba peticion’.

Nan a splica e detaye di ora cu un mucha no ta wordo reconoci y no ta un mucha naci na Aruba. Nan ta bisa cu a contesta y haci tur locual nan por a haci pa e persona cana su caminda pero huridicamente locual e persona ta desea no por.

Pa persona por traha y obtene e permiso cu e kier e mester sigui e caminda di DPL pa haci esaki, pasobra no por uza e mucha su paspoort Hulandes pa haci esaki. Ora cu e persona cana e caminda di DPL y e peticion sali positivo e por sigui traha.

DIMAS ta bisa cu nan ta haci nan esfuerso pa sigui informa manera nan a haci. E persona tin e derecho di sigui busca y wak ki posibilidad e ta haya pero sinembargo ta locual ley ta bisa y e persona no a bin na remarke pa loke e tabata kier. DIMAS a bisa cu ‘nos ta purba yuda tur hende’, pero den caso aki e mucha no por firma pa su mama.

E departamento ta bisa cu nan a duna e contesta necesario na persona y cu nan sistema huridico ta duna e persona derecho pa apelacion. El a haci uzo di esaki, den apelacion ta revela e caso, e prome decision di ley y su maneho, por manda pa LAR pa e ta den proceso, esey por tuma tempo pero tin su alcance y otro posibilidad huridico.

Tambe e informacion cu e persona a duna ta bisa cu e mester presenta periodicamente na Guarda Nos Costa (GNC). DIMAS a bisa cu pa esaki sucede mester a hay’e ta trahando sin tin e permiso di traha, pues pa e mesun motibo aworaki a pone meldplicht riba dje. Ta keda na e persona pa haci su proceso pa obtene permiso di trabou.