Departamento di Integracion, Maneho y Admision di Stranheronan (Dimas) a informa riba diferente restructuracion cu ta tumando luga den e departamento, entre otro un sistema nobo digital di registracion. Alabes ta aclara riba e colaboracion cu tin entre Dimas y IND na Hulanda.

Manera Bon Dia a yega di reporta den pasado, esunnan cu haya un permiso den cuadro di proyecto Dreamers no lo bin na remarke automaticamente pa aplica pa nacionalidad Hulandes. Mirando cu den cuminsamento di proyecto Dreamers a wordo comunica cu Dimas a colabora cu Servicio di Inmigracion y Naturalisacion (IND) na Hulanda, director di Dimas Kathy Paskel-Ruiz a detaya kico ta e colaboracion cu a tuma luga entre Dimas y IND.

E dos organisacionnan aki tin en comun cu tur dos ta duna servicio di otorga permiso y ehecuta maneho di stranheronan den Reino Hulandes. Pues loke a wordo palabra entre e dos organisacionnan tabata hustamente riba e parti di maneho.

“Ora cu nos cambia nos maneho, e por tin repercusion pa nan maneho tambe. Pues mester palabra cu otro. Nos a palabra entre otro kico tin cu haci den casonan extremo ora un persona cu nunca a aplica pa un permiso mester bin na remarke pa un permiso di estadia indefini Dreamers”.

Den e caso aki e departamento a tene cuenta cu otro persona cu si a haci su trayectorio normal y a haci tur pago na tempo pa haya nan permiso den ordo. En caso cu ambos persona haya e firma liber e ora no ta husto, segun sra. Paskel. Pues e departamento a pensa di ahusta ley pa asina haci un cobransa di 10 aña posibel. ‘Pero ora un persona haya su firma liber e ora el a tecnicamente cumpra e 10 añanan ey caba’.

No tin ahustacion di maneho di IND pa Dreamers

E departamento a dicidi di haci’e menos complica y no exigi ningun pago adicional apart di esun di e firma liber mes. Esaki IND a bay di acuerdo cu ne pasobra nan a pensa cu si e personanan haya chens pa paga pa tur e añanan bek, diripiente nan lo bin na remarke pa un nacionalidad Hulandes.

Pues IND a dicidi cu si personanan no a pidi den pasado, nan no lo por tapa e buraconan cu a wordo haci. Si esaki lo a ta e caso, e personanan lo a cumpli cu e rekisito di tin suficiente aña sin interupcion pa bin na remarke pa nacionalidad Hulandes. Sra. Paskel a clarifica un bes mas cu nacionalidad Hulandes no ta algo cu Dimas ta regla of envolvi cu ne. Cu esaki Gabinete di Gobernador y IND ta encarga.

Den tur caso e persona cu kier aplica pa un nacionalidad Hulandes mester cumpli cu e Rijkswet Nederlanderschap, cual ta e ley na nivel di Reino cu ta regla e nacionalidad.

Dimas a tene palabracion tambe cu e organisacionnan di maneho di stranheria na Boneiro y Corsou.

“Como organisacion bo mester wak den otro pais si e retonan cu bo ta enfrenta tambe ta conta pa otro. Esaki ta pa evita cu e tipo di casonan aki ta surgi atrobe den 10 aña”.

Dimas y buraconan den permiso

Si ta tira bista riba e data cu IND ta publica tocante aplicacion pa naturalisacion y opcion , cierto datonan ta resalta, manera den e rapport cu e instancia a publica, Trendrepportage naturalisatie en optie den aña 2007-2011.

A resalta cu relativamente mira Aruba ta e luga unda mas persona ta wordo nenga pa nan peticion di bira Hulandes a base di buraco den estadia. Den e sistema di registracion di IND, ta remarcabel cu e nacionalidadnan cu ta bin for di region Caribense, esta di America Latina y China ta wordo nenga mas frecuentemente a base di no cumpli cu rekisito di tin 5 aña por lo menos legal sin buraco den permiso.

Esaki compara cu negacion di Afghanistan y Iraq, cual mas tanto ta tuma luga na Hulanda mes y a base di no cumpli cu rekisito di tin un record di husticia limpi.

Bon Dia no a logra haya un reaccion di IND mes riba esaki, pero Dimas si a duna un comentario.

Aunke sra. Paskel no sa e cifranan specificamente, el a declara na nos cu den trayectorio pa un nacionalidad Hulandes, mester tene bon cuenta cu e estadia na Aruba. Alabes sra. Paskel ta splica cu e departamento tin un tarea dificil di trece bek documentonan di 15 aña of mas atras pa trata e aplicacionnan cu ta bay via Gabinete di Gobernador.

“Nos tin cu raporta con e persona a pidi y haya e permisonan y si esaki a sosode na tempo”.

Aki sra. Paskel ta pidi pa clientenan semper percura pa tur tramite wordo haci na ora. Manera cu ta skirbi den e buki di admision actualmente, e departamento ta kijk door de vingers si un persona tin un buraco no mas grandi cu 3 luna.

Ora cu un buraco ta wordo crea, pa IND ta conta cu mester cuminsa di 0. “Esaki ta algo cu nos por yuda cu ne mi ta kere pa medio di conscientisa nos clientenan”.

Alabes sra. Paskel a reconoce cu den pasado e servicio di Dimas lo por a cana poco slow. “Sinembargo tur permiso den principio ta valido pa 1 aña pues semper bo sa ora bo tin cu bin bek, 3 luna prome cu esaki caduca preferiblemente”.

Sistema conecta

Loke ta haci un diferencia den e servicio cu ta wordo brinda pa e departamento ta si tur e sistemanan di diferente departamento manera Dimas, Censo, SVB y otro instancianan lo ta conecta. Esaki sra. Paskel a splica cu ta e meta pa trece na Aruba, pero ‘nos no ta asina leu ainda’.

Sinembargo na Hulanda esaki ta e caso, pues si bo ta conoci na Servicio di Impuesto automaticamente e otro departamentonan tin e informacion concerni. Esaki ta haci cu e parti di administracion ta bay hopi mas facil. Sra. Paskel a splica cu internamente tambe tin cambionan cu ta wordo haci pa brinda servicio miho.“Por ehempel na mesun momento cu nos a introduci e sistema nobo SIRSA cual KPMG a yuda nos cu ne y a wordo financia pa medio di FDA, nos a bin cu un sistema nobo di intake”.

Sra. Paskel a splica cu tabata e caso antes cu si un persona entrega nan papelnan na e balie, e ta wordo gecheck despues cu esaki wordo tuma den parti atras. Aworaki ta e caso cu ta haci un pre-check prome cu tur documento wordo acepta na intake. “Loke tin di gana ta cu si tin algo robes den e documentacion, e persona ta wordo poni na altura inmediatamente. E ora ey nan por coregi loke falta den e aplicacion sin mester warda”.

Sinembargo e departamento a pidi pasenshi di su clientenan pasobra hopi cos ta cambiando den e departamento. “Nos tin cu cumpli cu ley, cual ta duna nos 12 siman y 12 siman extra den casonan excepcional”. Alabes Sra. Paskel a bisa cu e departamento ta purba wanta su mes na 6 siman pa procesa un aplicacion.

“Nos tin speransa cu den futuro, y nos no lo haci promesa sin cumpli prome, nos por trata un renobacion di permiso den un dia. Un same day service lo ta ideal si e pre-checker ta check cu tur cos ta den ordo. No awo, pero cu tempo esaki lo bin”.

‘Servicio a mehora pero ainda mester traha riba poco cos’

Bon Dia a acerca un cliente di Dimas mientras e tabata warda pa wordo atendi pa puntra con e mes ta haya e servicio di Dimas. “Actualmente mi tin cu bisa cu e servicio a mehora masha hopi y ta bon organisa. Nos tin cu warda basta ainda pero por lo menos tin luga di sinta comodo”.

Sinembargo e persona a critica cu no ta haya informacion hopi consistente for di e departamento, “depende na ken bo puntra, un ta bisa bo algo y otro ta bisa bo algo ful diferente.” E persona a experiencia tambe cu e trahadonan ta perde papel of no por haya cierto documento.

Alabes e tin di conoce cu e personal a bira hopi mas amabel y ta duna mas atencion na cliente.

Proyectonan andando

Dimas ta calcula cu poco poco e sistema digital di SIRSA lo wordo implementa y drecha den stapnan. Actualmente e departamento ta ocupa hunto cu KPMG pa traha un portal online unda pa cierto servicionan no lo mester ni bay na Dimas mes. E departamento ta ocupa ta habri cuenta na banconan unda lo por facilita e proceso di paga pa permisonan online.

Tambe a yega na un acuerdo cu Departamento di Impuesto pa pone un balie di SIAD den Dimas mes, ‘pa asina no mester toca porta di diferente instancianan di gobierno’. “Papelnan di Censo, e lo no mester trece mas. Papel di SVB den futuro no lo ta necesario tampoco. Nos lo ta intercambiando e informacion cu otro departamento via nos sistema conecta”.

Ora cu e proyectonan aki ta asina leu, sra. Paskel a priminti di comunica esakinan externamente.