Dimas ta calcula cu alrededor di 1000 persona lo beneficia di e Proyecto Dreamers pa duna muchanan y hobennan adulto indocumenta un permiso permanente. Nan ta duna prioridad na hoben di scol den klas di examen.
Directora di e departamento aki, Kathy Ruiz-Paskel a bisa cu nan ta calcula e cifra aki a base di informacion cu nan a compila di nan propio data. Pero tambe di muchanan inmigrante cu a drenta den nos sistema di enseñansa y cu ainda nan status legal di residencia no a wordo soluciona. E spirito di e proyecto aki cu gobierno a aproba ta dirigi riba un grupo di persona specifico, cu ya caba ta integra den nos comunidad. Kiermen muchanan di mayornan inmigrante cu a lanta, bay scol y forma na Aruba, pero cu no a defini totalmente nan status legal di residencia of estadia riba nos isla. Esun nan beneficia, Dimas lo otorga un permiso liber pa tempo indefini.
Di dos anochi informativo cu polis
Ayera mainta, sra. Ruiz-Paskel a duna informacion tocante e proximo sesion di informacion y dunamento di formulario pa esunnan interesa pa aplica pa e Proyecto Dreamers. E ta tuma luga na Cas di Cultura, diabierna awor. Prome cu 7’or di anochi lo cuminsa duna number, ya cu Cas di Cultura tin un capacidad limita tambe. Igualmente lo tin presencia di polis pa garantisa ordo publico. Considerando e avalancha di hende cu a presenta den e prome sesion informativo y di entrega di formulario diabierna pasa; nan a dicidi cu e di dos anochi informativo diabierna awor lo tuma luga na un luga mas grandi manera Bon Dia Aruba ya a publica. Pero e sitio aki tambe tin su limitacion ya cu e tin capacidad pa 570 hende. Esaki ta e cantidad cu nan lo atende mañan. Den e prome sesion a keda atendi alrededor di 250 persona; y e mesun anochi ey, 107 hende a mustra interes cu nan kier bin na remarca pa e proyecto.
Awor Dimas mester evalua cu nan ta cumpli cu nan exigencianan dunando prioridad na un grupo di ocho hoben cu ta biniendo cla cu nan studio secundario, segun e directora.
Nan lo reparti un cantidad di ticket pa cumpli cu e capacidad maximo aki; pero unabes cu nan ta caba y si tin mas hende pafo, esaki ta nifica cu Dimas lo organisa un tercer diabierna. Pero si no tin necesidad Dimas no lo bin cu un sesion adicional. Ta bon pa tene cuenta cu Dimas tambe ta suministra mas informacion riba e proyecto aki riba nan plataforma digital riba nan Facebook page of nan website. Si tin necesidad nan lo ofrece sesion general pa publico. Pero diabierna awor e lo ta informacion unicamente pa e Proyecto Dreamers.
Dimas lo ta aceptando peticion durante nuebe diabierna cu ta sigui durante luna di mei y juni. E peticion ta trata den 12 siman y nan ta duna preferencia na e candidatonan cu ta den examen awor y nan lo pidi colaboracion di Departamento di Enseñansa.
Exigencianan
Sra. Ruiz-Paskel a laga sa cu no tin un edad maximo pa aplica; pero un exigencia pa aplica ta esun cu e persona mester a bin prome cu su 13 aña Aruba. Si tin un hende cu pa ehempel aworaki tin 25 aña, pero el a drenta Aruba prome cu e tabatin 13 aña, ademas e tin mas cu 10 aña na Aruba, y di nan el a cumpli 5 aña como menor na Aruba, e ta un candidato potencial pa bin na remarca pa e Proyecto Dreamers. Menor na Aruba ta un hoben menor di 18 aña, pero door cu e regla ta cu esun cu ta aplica mester tin 5 aña na Aruba como menor, el a mester tin 13 of menos ora cu a bin biba na Aruba. Pues si e tabatin 14 aña logicamente e no ta aplica pa e Proyecto Dreamers.
E ta haya cu pa e parti di menor ta resulta mas facil pa demostra si e ta cumpli cu e añanan exigi pa aplica. E tipo di prueba cu Dimas lo tin den consideracion pa evalua si e persona a yega Aruba teniendo na cuenta nan exigencianan, entre otro e mester tabatin 5 aña como menor y e mester a participa den nos sistema di educacion. Akinan inscripcion di scol di tal aña pa tal aña lo por bira un prueba cu Dimas lo por comproba esey.
Tambe e stampel riba paspoort di e persona cu ta aplica lo por bira un prueba pa demostra cu e tin mas cu 10 aña bibando na Aruba. Tambe Dimas tin su sistema caminda nan por controla si e persona aki a sali of no for di Aruba. Pero den e sesion di diabierna nan no lo screen esun cu kier aplica pa e proyecto aki, sino cu nan lo wordo admiti pa haya informacion.
Un aspecto cu nan ta bay controla den e proceso aki –specialmente si ta trata di un adulto- ta esun cu ta aplica no tin antecedente penal y cu e parti di su conducta ta na ordo. Esaki ta un trabou cu nan lo haci conhuntamente cu Ministerio Publico (OM). Si ta trata di menor di edad, e persona cu ta bin pa haci aplicacion pe mester mustra cu e tin e custodia of cu e ta e representante legal di e mucha. Tambe cu e tin un permiso valido den man of den proceso.
Ayudo extra
Directora di Dimas a probecha pa haci un yamado na e hendenan cu no ta fit cu e cuadro exigi pa aplica pa e Proyecto Dreamers, pa nan cana e proyecto regular. El a splica cu un trayecto regular pa aplica pa un permiso a base anual cu e persona por keda renoba, te ora cu e ta yega su 120 luna legal caminda e por aplica pa un firma liber. Den caso di un mucha, nan por evalua despues di 5 aña na Dimas, kico ta e condicionnan pa e menor por aplica pa naturalisacion. El a laga sa cu esaki ta un trayecto separa y e informacion ey ta obtenibel na Gabinete di Gobernador.
Igualmente, sra. Ruiz-Paskel a bisa cu Dimas ta presenta informacion y nan ta purba di haci mas cla cu ta posibel. Tur foyeto relaciona cu e proyecto aki ta traduci den tres idioma. Tambe lo tin personal di cu lo yuda esunnan cu no ta compronde con pa yena e formularionan. Si tin intermediarionan cu ta ofrece nan servicio, esaki ta algo cu e cliente mes ta scoge y ta paga pe. “Esey ta su derecho si e ta haci si of no”, el a bisa. Pero di parti di Dimas nan ta promove pa e hende mes bin tramita su documento, pero si cliente ta scoge un intermediario ta su decision; y e mes ta core su propio riesgo.
Den curso di siman cu ta bini, Dimas lo tin personal den dos loket extra pa duna sosten y asistencia gratis na esnan di e proyecto Dreamers.
