DIMAS lo bin cu maneho nobo na augustus awor: Personanan cu nan peticion ta tarda por manda un keho oficial

Finalmente, DIMAS a reacciona riba e kehonan existente tocante tarda di permiso. Di acuerdo cu e maneho, un peticion di permiso cu ta wordo entrega, e no mester tarda mas cu 6 siman pa e cliente por bin cu su peticion di permiso cla. E periodo aki DIMAS por a larga cu cuater siman mas.

PR di DIMAS, Marilyn Wout a bisa cu basicamente nan cliente tin un periodo di 10 siman cu nan lo tin di warda pa su peticion di permiso por keda cla. E ta reconoce cu tin caso cu e por tuma hopi mas cu 10 siman. El a splica cu esaki ta depende di diferente factornan.

Nan ta conseha na clientenan cu na momento cu ta entrega nan peticion pa nan cuminsa conta desde e momento ey, cuanto siman nan permiso ta andando. Si nan ta ripara cu seis siman a pasa sin haya contesta, nan mester manda un keho oficial. Wout a bisa cu nan tin e tarea di bay investiga na unda e peticion di nan cliente ta pega pa busca un solucion.

Mayoria di e permisonan cu no a wordo aproba ainda ta debi cu nan peticion ta incompleto. Un motibo tin di haci tambe cu durante e temporada di shelter in place e proceso di permiso a bay via online. Pero instancia manera DPL tambe tabata cera y hopi peticion a wordo entrega incompleto den spera cu ora nan ta trata e peticion di e cliente, e por haya chens di entrega e papel di DPL.

Tambe tin permiso cu ta bao revision algun a haya negacion pa algun motibo, otronan cu ta canando, y otronan cu a sali caba. E ta conseha e personanan cu nan permiso ta bay caduca pa cuminsa entrega nan peticion cu tres luna delanta.

Wout a splica cu dado momento nan acumula basta hopi peticion incompleto. E no tabatin e cifra exacto di e cantidad di peticion haci online cu a wordo haci durante e lunanan aki, pero e ta bay den miles, tanto pa renobacion como nobo.

E cliente cu ta haya un negacion of un cancelacion, DIMAS ta informa nan debidamente. Na momento cu nan tin tur nan documentonan, nan por haci un cita di nobo pa entrega asina tur nan documentonan completo.

Cuminsando mañan, DIMAS ta cuminsa habri su portanan pa atende nan clientenan via cita digital y teniendo cuenta cu tur protocol y higiena cu e Covid crisis ta exigi actualmente.

Di otro banda aworaki DIMAS ta bezig cu un maneho nobo cu lo drenta na vigor entrante luna di augustus awo, segun minister di Husticia, Andin Bikker. E maneho aki ta inclui aspectonan di proteccion laboral, considerando cu debi na e crisis actual di Corona virus, tin menos cupo di trabao disponibel.