Directora di Dimas, mr. Kathy Paskel, a splica cu Dimas, a base anual
ta atende un promedio di 15 mil peticion di permisonan regular. Banda di esey tin peticionnan pa estadia turistico y otro productonan y cada un tin nan proceso cu nan tin cu cana..
Roma no a wordo traha den un dia
E dicho ta papia pa su mes. “Roma no a wordo traha den un dia” y esey tambe ta conta pa permisonan regular cu wordo manda aden pa procesa. Den ley di admision tin un termino di 12 siman pa atende permisonan regular y esey ta cuminsa na momento cu e persona entrega su aplicacion completo manera cu e lista di rekisito ta pone y ta rekeri. Asina ta, den casonan asina, pasenshi ta hunga un papel hopi importante.
Cu pasenshi ta gana gloria
Tur hende cu haci un aplicacion kier haya un contesta dentro di un tempo rasonabel. Pa locual cu ta e termino cu Dimas tin pa atende cu permiso, esaki ta stipula den ley.
Despues di a pasa e proceso di entregamento di e peticion, e persona ta haya un comprobante cu e tin algo den tramite y e ora ey e termino ta conta.
Ley ta stipula tambe cu Dimas, actuando e ora den nomber di minister, no keda cla cu e peticion cu e tin, tambe e tin oportunidad pa extende e termino di 12 siman mas. E total pa ley cu tin pa atende cu un peticion ta 6 luna. Ta monitor e terminonan cu ta atende, ora cu ta trata volumen. Claro cu tin cantidadnan por ta cu por surpasa e 12
siman y e personanan ey lo tin un sentimento sigur cu e proceso a tarda y esey ta berdad den cierto casonan, ta haci mas investigacion y den e casonan ey e lo por pasa 12 siman.
3614 peticion te cu awor aki
Apesar cu tin hende ta keha cu nan peticion ta tarda, sinembargo tin cu bisa cu e proceso aki ta bayendo relativamente lihe. Segun Paskel, por bisa cu riba 80% di e peticionnan entrega, a haya un contesta dentro di seis siman. Esaki ta a base di cifranan cu tin pa e aña aki y tambe mirando e terminonan cu a tuma un decision. Te asina leu un total di 3614 peticion a keda entrega te cu dialuna. Naturalmente esunnan
entrega dialuna, ta mas cu logico cu nan proceso lo cuminsa core awo.
E percepcion cu tin, sigur lo tin un cantidad cu no a haya un contesta dentro di e termino di 12 siman y ley ta duna e posibilidad pa extende esey cu 12 siman mas. Sinembargo e gran mayoria y ta papiando na Dimas di un total di 15 mil peticion pa aña promedio. E gran mayoria ta haya su contesta dentro di e 12 siman cu ta rekeri pa ley.
Proceso di e peticion
Paskel a splica cu Dimas ta ehecuta e maneho di minister y su maneho ta aplicacion ta wordo someti na Dimas ta wordo entrega completo. Na momento cu e persona haci su cita online, bay Dimas, lo repasa e lista di rekisito cun’e y si tur cos ta na ordo y tur cos t’ey, e ora eynan e por tuma e peticion ey den tramite y e ora e oficina lo sigui wak si den contenido, si tur cos ta na ordo, pidi demas conseho di e otro departamentonan y despues duna e persona un contesta.
Por pasa cu na final di un trayecto asina, e persona por wordo nenga. No semper ora
cu entrega un cos completo, ta resulta den un permiso. Ta mantene na e ley y e maneho di minister riba esaki y si den caso cu e persona, no a cumpli cu tur e rekisitonan segun ley y maneho, e lo por resulta den un negacion tambe. Eynan ta wak cu desde aña pasa cu gobierno a reenforsa cu e parti di e prome permisonan mester wordo spera den exterior, cu ta wak cu e cantidad di nengamento a base di esey a
subi. E cantidad di hendenan cu haya no un permiso pero un negacion, pasobra nan ta na Aruba pasobra ta trata di un prome permiso, a subi y esey ta trece un presion riba personanan cu kier entama un apelacion pasobra nan no ta di acuerdo cu decision cu gobierno a tuma.
Tin tambe extension pero esey ta mas riba parti di estadia turistico, unda cu ta
wak e volumen di e cantidad di personanan cu ta bin na Dimas pa pidi un extension mas largo cu 30 dia, a subi y e Venezolanonan ta e grupo mas grandi cu e aña aki ta representa 51% di e cantidad di peticionnan cu tin. Hunto cu e Colombianonan, e dos gruponan mas grandi cu tin ta pidi extension di estadia turistico, no pa keda na hotel, pero pa keda cerca famia of conoci. Ta un grupo cu a wak cu ta pone un presion
basta grandi cu ta fluho di productonan cu tin cu atende y pa esey tambe a tuma un decision cu entrante di 1 di juni lo amplia e servicionan cu a duna door di pone cu por haci cita di antemano, no mester bin para den rij pa coy un number pa wordo atendi pa cierto productonan mas cu tabata yama “Walk in clients”, pero por haci e cita online y ta bin na e ora y dia cu a boek e cita pa bin entrega e estadia turistico, of duplicado of ta bin pidi un declaracion cu ley no ta aplicabel pa bo, tur eseynan ta posibel awo cu ta haci e cita online y ta bin Dimas na e ora indica, pa reparti asina e cantidad di
hendenan cu ta wordo atendi a base diario, Paskel a finalisa.
