Durante un conferencia cu minister di Comunicacion, Transporte y Sector Primario, Chris Romero a ofrece ayera pa e medionan local, el a duna di conoce un inversion cu gobierno a haci pa mehora e servicionan na Directie Telecommunicatie Zaken, pa nan por ofrece un miho servicio pa comunidad.
Romero a splica cu Directie Telecommunicatie Zaken (DTZ) tin varios aña sin haya ekiponan nobo y tampoco tabatin otro tipo di inversion pa optimalisa den e tempo moderno cu ta bibando awor.
El a menciona cu nan tabatin cierto programa den nan computer cu nan no por traha cu nan, pa via cu e aparatonan y sistema tabata hopi bieu. Asina mes el a laga sa cu nan tambe a cambia e structura di e departamento, cu segun Romero ta contribui cu e pais enormemente door di e leynan di telecomunicacion.
Romero a informa cu nan a haci un inversion grandi (pero no a duna di conoce e suma) pa ofrece un miho servicio, pa cos por cana mas lihe y e trahadonan por intercambia documentonan cu otro mas lihe, manera e tecnologia ta na e momentonan aki, pa motibo cu e departamento no tabata conta ni cu internet ni cu wi-fi.
Tocante e departamento tecnico, inspeccion antes tabata bay na diferente sitionan pa haci nan debido control y tur cos tabata riba papel y tempo na trabou tabata hopi mas cu e sistema cu nan tin awendia. Na e momentonan aki tur cos a bira digitalisa y tur e informacion ta riba computer.
Tambe Romero a declara cu nan a inverti den un aparato cu ya mama ‘Logger’, cu ta haci control debido y e ta graba diferente radionan, pa motibo cu tambe nan kier proteha esunnan cu tin radio y tambe e presentadonan.
