(NLTimes) –Un brug cu a keda construi usando un printer 3D a haci su apertura na Oudezijds Acherburgwal na Amsterdam pa mita di juli. Esaki ta e prome brug 3D printed traha di staal na mundo, pero subi e brug por ta peligroso pa esnan di edad avansa y esnan cu discapacidad.
Un banda di e piesa, dos stap grandi marca cu pintura geel ta conduci na e brug. Sin ramp, haya acceso na e brug ta dificil, pa cualkier persona riba rolstoel of esnan cu tin problema pa cana.
Regularmente ta sucede cu un persona ta rekeri di asistencia pa subi of baha for di e brug, segun un empleado di un tienda cercano. “Tur cu ta mira esey pasa ta yuda, pero mainta no tin niun hende”, el a bisa na Het Parool.
E brug por ta un menasa no solamente pa hende cu discapacidad, pero tambe pa esnan burachi of intoxica. “Turistanan ta core burachi aki. Bo por mira pa bo mes kico ta pasa e ora ey”, segun Fabiana Jonkers, kende tin su atelier cerca, a bisa.
“Nos a warda un tempo largo pa e brug”, un residente cercano a bisa. “E brug ta un bunita idea for di perspectiva di mercadeo, pero e ehecucion ta cuestionable. E ta peligroso awo.”
E brug, diseña pa Joris Laarma, tabatin su apertura dia 15 di juli cu Reina Maxima. E ta pisa alrededor di seis ton y lo keda den Oudezijds Achterburgwal pa dos aña. E diseño di e brug a ser mustra durante Dutch Design Week na Eindhoven na 2018, unda el a gana e premio Dutch Design y tambe un premio di audiencia.
Originalmente, e plan tabata pa construi un ramp chikito pa hacie accesibel pa rolstoel, ‘pero esey ta durando mas largo di loke a pensa’, un vocero di e districto di ciudad a bisa. “Mientras tanto, nos a purba di haci e situacion aparente cu e pintura geel y un borchi, y spera cu esey ta suficiente”, e vocero a bisa.
