“Si awor no ta e momento pa habri, dificilmente bo por bisa mas despues, bo por habri,” asina minister di Turismo, Dangui Oduber a referi na e posibilidad di habri pronto nos frontera y reactiva nos industria turistico.
Un aspecto cu el a referi na dje ta cu si nos ta sigui tarda pa kita e ‘lockdown’ den nos frontera, mas dificil e situacion ta bira pa nos tur. E lo sigui trece un impacto pa nos economia, ya cu mas negoshi ta bay cera y mas hende lo ta desemplea. Pero tras di esaki tambe e ta haya cu ‘mas estricto e medidanan di Hulanda ta bay bira riba nos’.
E mandatario a laga sa cu cada bes cu pais Aruba mester bati na porta di gobierno Hulandes pa pidi un sosten financiero, e ta bira mas dificil. Ya cu cada bes tambe gobierno Hulandes ta bin cu condicionnan ‘un tiki mas estricto’.
El a referi cu e ultimo condicion cu gobierno Hulandes a bin cune ta pa gobierno di Aruba corta 5 miyon riba presupuesto destina pa cuido medico of gasto di AZV.
Oduber a informa cu dialuna mainta nan tabatin un combersacion bilateral cu secretario di salubridad di Hulanda. Nan a señala e preocupacion cu gobierno di pais Aruba tin. Na momento cu nan ta pidi pa gobierno di Aruba corta den cuido medico, e ta contradictorio. Ya cu na mesun momento nan ta pidi pa bay corta riba gasto di cuido medico. Pero di otro banda nan ta pidi pa nos pais bay prepara miho y aumenta nos capacidad di cuido. Y tur esaki ta demanda inversion.
“Ta dificil pa compronde cu nos tin cu corta; y na mesun momento nos tin cu inverti den nos cuido medico,” el a bisa.
Un palabra cu a cay den bon tera y cu ta pone hende reflexiona riba dje, ta ora cu e hoben mandatario a bisa: “E por zona fastioso, pero nos bida tin cu sigui. Nos mester por maneha Covid. No Covid maneha nos bida.”
El a laga sa cu pa logra esaki, nos mester cuida mas miho di loke nos tabata haci anteriormente, teniendo cuenta cu tur regla di bon higiena y prevencion.
