Un biaha mas un simbolo di nos pais, hunto cu nos himno y bandera, producto di nos Status Aparte, esta nos Florin Arubano, ta den un dilema cu e dollar.

Despues cu Hulanda a propone den su landspakket pa nos pais dolarisa nos economia, mescos cu e islanan BES, e debate a lanta cabes.

No ta e prome bes cu e tipo di debate aki riba nos sistema monetario a surgi. Mas cu tres decada atras tempo cu Aruba tabata na caminda pa su Status Aparte, instancianan manera Fondo Monetario Internacional (IMF) y Camara di Comercio (KvK) a yega di conseha pa Aruba no bin cu propio Banco Central, ni su propio moneda. Awe e discusion aki ta wordo lanta bek, hunto cu e condicionnan cu Hulanda a bin cune pa nos pais por tin acceso na facilidad financiero den forma di prestamo faborabel pa atende e crisis actual.

MinPres y dolarisacion

Durante e di dos ronda di consulta cu sindicatonan y gremio comercial, Prome Minister Evelyn Wever-Croes a referi na e topico di dolarisacion di nos sistema monetario.

MinPres su presentacion relaciona cu e landspakket y e condicion cu Hulanda, el a referi cu Hulanda kier bin cu un estudio pa midi con fuerte nos sistema financiero ta y kico mester cambia. Pero tambe un estudio cu Hulanda kier pa wordo haci pa mira kico ta e gastonan cu nos propio moneda tin versus dolarisacion.

Premier Wever-Croes ta considera e tema aki como uno delicado. El a bisa cu ya caba nos Banco Central a yega di haci un tipo di estudio asina na Aruba. Nan a yega di monitor e circulacion di dollar na Aruba. E instituto aki a yega na e conclusion cu esaki no ta na beneficio di Aruba, pa diferente motibo, specialmente gastonan y e ta haci nos pais mas caro.

KvK

Presidente di Camara di Comercio Aruba (KvK), Sr. Satish Daryanani a declara na Bon Dia Aruba cu sistema monetario ta algo importante pa un pais su economia por draai.

Si e ta dollar of florin, e no ta importante. Loke si e ta considera cu ta importante ta cu e moneda of placa por circula debidamente pa economia por move.

Pa loke ta e parti si Aruba mester keda cu su moneda florin, Sr. Daryanani ta haya cu nos pais a bin cu su propio moneda y nos tur a percura pa mantene. Principalmente e ta haya cu tin un maneho ariba dje. Pues e ta kere cu e parti di dolarisacion tambe ta un decision di Banco Central di Aruba cu Banco Central di Hulanda, y naturalmente departamento di Finanzas.

ATIA
Di su banda, Sra. Michelle de Groot di ATIA, ta comparti e mesun opinion di MinPres. El a indica cu un studio a wordo haci caba, y logicamente mester analisa e estudio AKI, y basa na esey, saca conclusion kico ta miho pa Aruba.

“No por bisa di adelanta cu e ta bon of cu e ta malo,” el a bisa.

 

AF&BA

Pa Sr. Jan van Nes di Aruba Food & Beverage Association a referi na e topico di dolarisacion di nos economia, mirando cu e ta bin for di un sector caminda dollar semper a yega di circula normalmente y sin problema. Aunke e mes no a indiga suficiente den dje pa duna un opinion. Sinembargo el a trece dilanti cu nos industria turistico ta hopi dolarisa caba.

Segun Sr. Van Nes, gran parti di e sector di restaurant ta wordo paga cu credit card y su comisionnan. Pero tambe pago cash cu dollar. P’esey e ta reitera cu nos economia ta hopi dolarisa caba. Pero a pesar di esey, oficialmente florin ta nos moneda.

E no kier a bay mucho profundo riba e topico aki. E ta prefera di ta bon informa prome, riba kico lo ta e beneficio of consecuencia di introduci un cambio den nos sistema monetario actual.